ޔޫރަޕިއަން ޔޫނިއަންގެ ގައުމުތަކުގައި ދޫނި ރޯގާ ފެތުރެމުންދާ މިންވަރު އިތުރުވަމުންދާތީ، ފްރާންސްއިން އެ ގައުމުގެ ދޫނި ރޯގާގެ ނުރައްކަލުގެ މިންވަރު މަތިކޮށްފި އެވެ.

ފްރާންސްގެ ދަނޑުވެރިކަމާ ބެހޭ މިނިސްޓްރީން ބުނީ މި ނިންމުން ނިންމާފައިވަނީ އަވައްޓެރި ގައުމުތަކުގައި ދަތުރުކުރާ ވައިލްޑް ދޫނިތަކުގެ ތެރެއިން ދޫނި ރޯގާ ޖެހިފައިވާ ދޫނިތައް ފެނިފައިވާތީއެވެ. ނުރައްކަލުގެ މިންވަރު އުފުލުމާ ގުޅިގެން، ދޫނި ފާމުތަކުގައި ސަލާމަތީ ފިޔަވަޅުތައް ހަރުދަނާކުރުމަށް ވަނީ އަންގާފައެވެ.

މި އާ ނިޒާމު ތަންފީޒުކުރަން ފަށާނީ ހޮނިހިރު ދުވަހުން ފެށިގެންނެވެ. މިއީ މިދިޔަ އަހަރު ވެސް އެޅި ފިޔަވަޅެކެވެ. މިދިޔަ އަހަރު މިފަދަ ފިޔަވަޅެއް އަޅާފައިވަނީ ޑިސެމްބަރު މަހުގައެވެ.

ފްރާންސްގައި ހޫނު މޫސުމުން ފެށިގެން މިހާތަނަށް ދޫނި ފާމުތަކުގައި ދޫނި ރޯގާގެ އަށް ހާދިސާ ރިޕޯޓުކޮށްފައިވެއެވެ. މިދިޔަ މަހު ފްރާންސްއިން ވަނީ ފާމްގައި ގެންގުޅޭ ދޫނިތަކަށް ދެވަނަ ފަހަރަށް ވެކްސިން ދޭން ފަށާފައެވެ. މިދިޔަ އަހަރުގެ ވެކްސިނޭޝަން ޕްރޮގްރާމުގެ ސަބަބުން ދޫނި ރޯގާ ފެތުރުން ކޮންޓްރޯލްކުރުމަށް އެހީތެރިވެފައިވާކަމަށް ބެލެވެއެވެ.

ހަމަ އެހެންމެ، އިނގިރޭސިވިލާތުން ވެސް ވަނީ އެ ގައުމުގެ ނުރައްކަލުގެ މިންވަރު "މަތިކުރުމަށް ފަހު، ޔޯކްޝަޔާގައި ދޫނި ރޯގާ ޖެހުނު ކޭސްތަކެއް ރިޕޯޓުކޮށްފައެވެ. ޔޫރަޕުގެ އެކި ގައުމުތަކުގައި މި ބަލި އަވަސް މިނެއްގައި ފެތުރެމުންދާތީ، ދޫނި ވިޔަފާރިއަށް ލިބިދާނެ ގެއްލުންތަކާއި އިންސާނުންނަށް ކުރިމަތިވެދާނެ ނުރައްކަލުން ސަލާމަތްވުމަށް އަވަސް ފިޔަވަޅުތަކެއް ދަނީ އަަޅަމުންނެެވެ.