ޔޫކްރޭނުގެ ކުރިން ރަޝިޔާ އާއި އެމެރިކާގެ ރައީސް ޑޮނަލްޑް ޓްރަމްޕް މަޝްވަރާކުރެއްވުމުން، ޔޫކްރޭނުގެ ރައީސް ވަޑިމިޔަރ ޒެލެންސްކީ ހިތްހަމަނުޖެހުން ފާޅުކުރައްވައިފިއެވެ.

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް ރަޝިޔާގެ ރައީސް ލަޑިމިޔަރ ޕޫޓިންއާ ސައުދީ އަރަބިއްޔާގައި ބައްދަލުކުރައްވަން ހަމަޖެހިފައިވާ ކަމަށް ޓްރަމްޕް އިއްޔެ ވަނީ ވިދާޅުވެފައެވެ.

ޓްރަމްޕް މި ކަން ހާމަކުރައްވާފައިވަނީ، ޕޫޓިންއާ އެކު ފޯނުން ގުޅުއްވައި ދޮޅުގަޑިއިރެއްހާއިރު ކުރެއްވި މަޝްވަރާތަކަށްފަހުއެވެ.

އެމެރިކާގެ ނައިބު ރައީސް ޖޭޑީ ވާންސް އާ ޖަރުމަނުގައި މިއަދުގެ ވަގުތެއްގައި ބައްދަލުކުރައްވަން ހަމަޖެހިފައިވާއިރު، ޒެލެންސްކީ ވިދާޅުވީ، އެމެރިކާ އާއި ޔޫކްރޭނު ގުޅިގެން "ޕޫޓިން ހުއްޓުވުމުގެ" ޕްލޭނެއް އެކުލަވައިލަންޖެހޭ ކަމަށެވެ.

"މިނިވަން މުސްތަޤިއްލު ޤައުމެއްގެ ހައިސިއްޔަތުން، އަޅުގަނޑުމެންގެ ބައިވެރިވުމެއް ނެތް ގޮތަށް އެކުލަވައިލެވޭ އެއްވެސް އެއްބަސްވުމެއް އަޅުގަނޑުމެންނަށް ބަލައެއް ނުގަނެވޭނެ،" ޒެލެންސްކީ ވިދާޅުވިއެވެ.

ޔޫރަޕުގެ އިއްތިހާދުން ވެސް ވަނީ، ސުލްޙައިގެ އެއްވެސް އެއްބަސްވުމެއް އެކުލަވައިލަންޖެހޭނީ ޔޫކްރޭނުގެ ފުރިހަމަ ބައިވެރިވުމާއި ބަހެއް އޮވެގެން ކަމަށް ގޮވާލައިފައެވެ.

ދެވަނަ ދައުރަކަށް އެމެރިކާގެ ރައީސްކަމަށް ވަޑައިގެންނެވި ޓްރަމްޕް ވަނީ ރަޝިޔާ-ޔޫކްރޭނުގެ ހަނގުރާމަ ނިންމުމަކަށް ގެންނަން އަމާޒު ހިއްޕަވައިފައެވެ.

މިގޮތުން، ވެރިކަމަށް ވަޑައިގަންނަވަތާ 24 ގަޑިއިރުގެ ތެރޭގައި އެ ހަނގުރާމަ ނިމުމަކަށް ގެންނަވާނެ ކަމަށް، ރިޔާސީ ކެމްޕޭނުގެ ތެރޭގައި ޓްރަމްޕް ވަނީ ވިދާޅުވެފައެވެ.