އދ. ދިގުރަށް ކައިރީގައި ސްނޯކްލިން އަށް ދިޔަ ސިންގަޕޫރުގެ 15 އަހަރުގެ އަންހެން ކުއްޖަކު ދޯނީގެ ބުރަފަތީގައި ޖެހި މިއަދު މަރުވެއްޖެއެވެ.

ފުލުހުންގެ ބަޔާނުގައި ބުނެފައިވާ ގޮތުގައި، މަރުވި ކުއްޖާއަކީ އދ. ދިގުރަށަށް ވޭލް ޝާކް ރިސާޗެއް ހެދުމަށް ސްޓަޑީ ޓުއަރއެއްގައި ގޮސްއުޅުނު ޓީމެއްގައި ހިމެނޭ ކުއްޖެކެވެ. އެ ކުއްޖާ މަރުވެފައިވަނީ ސްނޯކްލިން ކުރަން ދިޔަ ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ޒަޚަމްވުމުގެ ސަބަބުންނެވެ.

މި ހާދިސާ ފުލުހުންނަށް ރިޕޯޓުކޮށްފައިވަނީ މިއަދު ހެނދުނު 9:55 ގައެވެ. ފުލުހުން ބުނި ގޮތުގައި، އެ ކުއްޖާ ދިގުރަށު ހެލްތު ސެންޓަރަށް ގެންދިޔައިރުވެސް މަރުވެފައިވާކަމަށް ހެލްތު ސެންޓަރުން ފުލުހުންނަށް މަޢުލޫމާތު ދީފައިވެއެވެ.

ހާދިސާއާ ގުޅިގެން ފުލުހުން ވަނީ ތަޙުޤީޤު ފަށާފައެވެ. އަދި މި މައްސަލައިގެ އިތުރު ތަފްސީލު ލިބުމުން ހިއްސާކުރާނެ ކަމަށް ފުލުހުން ބުނެފައިވެ އެވެ.