ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެފައިވަނީ ގޭންގުތައް ހިންގުމަށާއި، މަސްތުވާތަކެތީގެ އައްޑާތަކުގެ ގޮތުގައި ބޭނުންކުރާ ތަންތަން ދައުލަތަށް ނެގޭނެގޮތަށް ޤާނޫނަށް ބަދަލުގެންނަވާނެ ކަމަށެވެ. މި ވާހަކަ ވަޒީރު ވިދާޅުވެފައިވަނީ ހުޅުމާލޭ ދެވަނަ ފިޔަވަހީގެ ހިޔާ ފްލެޓެއްގައި ރަހީނުކޮށްފައިވާ މީހަކު ސަލާމަތްކުރުމަށް ފުލުހުން ކުރިއަށްގެންދިޔަ ކާމިޔާބު އޮޕަރޭޝަނަށްފަހު މީޑިއާއަށް ދެއްވި އިންޓަވިއުއެއްގައެވެ.

ވަޒީރު ވިދާޅުވީ މި ސަރުކާރު ހަވާލުވިއިރު، ރާއްޖޭގައި ގޭންގު ކުށްތަކާއި، މަސްތުވާތަކެތި ވިއްކުމާއި ބޭނުންކުރުމުގެ މައްސަލަ އޮތީ އިންތިހާއަށް އިތުރުވެފައި ކަމަށެވެ. އެހެންކަމުން ރައީސުލްޖުމްހޫރިއްޔާގެ ޢަމާޒަކަށްވީ މި ދައުރުގެ ތެރޭގައި މި މައްސަލައަށް ދާއިމީ ޙައްލެއް ހޯދުން ކަމަށް ވަޒީރު ފާހަގަކުރެއްވިއެވެ. މިކަމަށްޓަކައި ބައެއް ޤާނޫނުތަކަށް އިޞްލާހު ގެނަން ޖެހޭކަމަށާއި، ފުލުހުންގެ ޚިދުމަތުގައި ގޭންގު ކުށްތަކަށް ޚާއްސަ ޔުނިޓެއް ޤާއިމުކޮށް، އޭގެދަށުން ވަރަށް ގިނަ މަސައްކަތްތަކެއްކޮށް، މިހާތަނަށްވެސް ބޮޑެތި ކާމިޔާބީތައް ހޯދާފައިވާ ކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ ސަރުކާރުން ގެންނަ ބަދަލުތަކުގައި ގޭންގު ކުށްތައް ކުރާ މީހުންނާމެދު ޤަނޫނުން އެންމެ ހަރުކަށު ފިޔަވަޅު އަޅާނެ ކަމަށެވެ. އެންމެ މުހިންމީ އާންމު ރައްޔިތުންގެ ރައްކާތެރިކަން ކަމަށާއި، އެކަމަށް ހުރަސްއެޅޭ އެއްވެސް ކަމަކަށް ސަރުކާރުން ފުރުޞަތު ނުދެއްވާނެ ކަމަށް ވެސް ވަޒީރު ވިދާޅުވިއެވެ.

ގޭންގު ކުށްތައް މަނާކުރުމުގެ ޤާނޫނަށް ގެންނަ އިސްލާހުގައި އެފަދަ މައްސަލަތަކުގައި ހަރުކަށު ފިޔަވަޅުތައް އެޅުމަށް ހިމަނާފައިވާނެ ކަމަށާއި، އެންމެ މުހިންމު ޢަމާޒަކީ އެފަދަ މައްސަލަތަކަށް އޮތް ފުރުޞަތު ކުޑަކޮށް އަދި ރައްޔިތުންނަށް އޮތް ގެއްލުން ކުޑަކުރުން ކަމަށް ވަޒީރު ވިދާޅުވިއެވެ. އެގޮތުން ސަރުކާރުގެ މަޝްރޫޢުތަކުން ދޫކޮށްފައިވާ ފްލެޓްތަކުގައި ގޭންގުތަކާއި މަސްތުވާތަކެތީގެ އައްޑާގެ ގޮތުގައި ހިންގާ ތަންތަން އަނބުރާ ދައުލަތަށް ނެގޭނެ ގޮތަށް ޤާނޫނަށް އިސްލާހު ގެނައުމަށް ނިންމަވާފައިވާކަން ވަޒީރު ފާހަގަކުރެއްވިއެވެ.  

ވަޒީރު އިތުރަށް ވިދާޅުވީ ކުށްކުރާކަން ކަނޑައެޅިގެން އެނގޭއިރުވެސް، މިހާރު ޤާނޫނުތައް އޮތްގޮތުން މައްސަލަ ސާބިތުކޮށް ފިޔަވަޅުއެޅުމުގައި ވަރަށް ގިނަ ގޮންޖެހުންތައް އެބަހުރިކަމަށެވެ. އަދި ވަރަށް ނާޒުކު މައްސަލަތަކުގައި ވެސް ކުށްކުރާ މީހުން އަނބުރާ މުޖުތަމަޢުއަށް ދޫވެގެންދާތަން ފެންނަކަމަށާއި، ސަރުކާރުގެ އެންމެ ބޮޑު ޢަމާޒަކީ ކުށްކުރާ މީހުންނަށް ޤާނޫނުގެތެރެއިން ސަލާމަތްވެވެން އޮތް ގޮތްތައް ބަންދުކޮށް، އެންމެ ހަރުކަށި ފިޔަވަޅު އެޅުންކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ތަކުރާރުކޮށް ކުށްކުރާ މީހާ ޤާނޫނުގެ އަތްދަށުން ދޫވެގެން ނުވާނެކަމަށެވެ. ނަމަވެސް ރާއްޖޭގައި މިހާތަނަށް އެ ފުރުޞަތު ފުޅާ ދާއިރާއެއްގައި ދެވެމުންގޮސްފައި އޮތްތަން ފެންނަން އެބައޮތްކަމަށާއި، އިދާރީ ކުޑަކުޑަ މައްސަލައެއްގެ ސަބަބުން ނުވަތަ ނަގަންޖެހޭ ފިޔަވަޅެއް ނުނެގުނޭ ކިޔާފައި އެފަދަ މީހުން ސަލާމަތްވެގެންދާ ކަމަށް ވެސް ވަޒީރު ވިދާޅުވިއެވެ. އެހެންކަމުން ޤާނޫނުތަކަށް ގެންނަ އިސްލާހުތަކާއެކު، ކުށްތައް ހުއްޓުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވާފައިވާ ޢަމާޒަށް ވާސިލުވެވޭނެކަމަށް ވަޒީރު ވިދާޅުވިއެވެ.

ހިޔާ ފްލެޓެއްގައި ރަހީނުކޮށްފައިވާ މީހަކު ސަލާމަތް ކުރުމަށް ފުލުހުން ކުރިއަށްގެންދިޔަ އޮޕަރޭޝަންގެ ކާމިޔާބީ ފާހަގަކުރައްވައި ވަޒީރު ވަނީ، އެކަން ކުރިއަށްގެންދިޔައީ ވަރަށް ޕްރޮފެޝަނަލް އަދި ތަޢުރީފު ޙައްޤު މަސައްކަތެއްގެ ގޮތުގައިކަން ފާހަގަކުރައްވައިފައެވެ. ފުލުހުން އަބަދުވެސް ތިބޭނީ ރައްޔިތުންނަށް ބޭނުންވާ ރައްކާތެރިކަން ދިނުމަށް ތައްޔާރަށްކަމުގައި ވަޒީރު ވިދާޅުވިއެވެ.

ހުޅުމާލޭގެ ދެވަނަ ފިޔަވަހި ބެލެހެއްޓުމުގެ މަސައްކަތްތައް މިހާރަށްވުރެ ހަރުދަނާ ކުރައްވާނެކަމަށް ވެސް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވިއެވެ.