ރައީސް ޑޮކްޓަރ މުޙައްމަދު މުޢިއްޒުގެ ވެރިކަމުގައި ޞިއްޙީ ދާއިރާ އިން ކުރައްވާފައިވާ މަސައްކަތްތަކުގެ ވަނަވަރު ހިމެނޭ ގޮތަށް ތައްޔާރުކުރައްވާފައިވާ "ހަފުތާ 52" ފޮތް ރޭ ނެރެދެއްވައިފި އެވެ. 

ހުޅުމާލޭ ސެންޓްރަލް މާކުގައި ރޭ ފެށި ހެލްތު އެކްސްޕޯ 2024 ގައި މި ފޮތް ނެރެދެއްވީ ނައިބް ރައީސް އަލްއުސްތާޛު ހުސައިން މުހައްމަދު ލަތީފެވެ. މި އެކްސްޕޯއަކީ ދުޅަހެޔޮ މުޖުތަމަޢެއް ބިނާކުރުމަށް ޞިއްޙީ ދާއިރާއިން ސަރުކާރުން ކުރައްވަމުންދާ މަސައްކަތްތަކާއި ޞިއްޙީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމަށް، މިނިސްޓްރީ އޮފް ހެލްތުން އިންތިޒާމުކުރައްވައިގެން ދެ ދުވަހުގެ މުއްދަތަށް ކުރިއަށް ގެންދަވާ ހަރަކާތެކެވެ.

އެކްސްޕޯ ހުޅުވުމުގެ ގޮތުން ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ ނާޒިމް ވިދާޅުވީ އެކްސްޕޯގެ މައިގަނޑު ބޭނުމަކީ ދުޅަހެޔޮ މުޖުތަމައެއް ބިނާކުރުމަށް އެކަމާ ގުޅޭ މައުލޫމާތު އާންމުންނަށް ފޯރުކޮށްދިނުމާއި އެ އާދަތަކަށް މީހުން ހޭލުންތެރިކުރުވުން ކަމަށެވެ. އަދި ރައީސް ޑޮކްޓަރ މުހައްމަދު މުއިއްޒުގެ ސިއްހީ ސިޔާސަތު ބައްޓަން ކުރައްވާފައިވާ އަސާސްތަކުގެ ތެރޭގައި އެންމެ ބޮޑަށް ހިމަނާފައި ވަނީ ބަލިމަޑުކަމުގެ ފަހަތުން ދުވާ ސިއްހީ ނިޒާމަކުން ސަލާމަތްވެވޭނެ ގޮތްތަކަށް ކަމަށް އޭނާ ވިދާޅުވި އެވެ.

ހެލްތު އެކްސްޕޯގައި ހެލްތު މިނިސްޓަރު ނާޒިމް ވާހަކަ ދައްކަވަނީ. --ފޮޓޯ: ރައީސް އޮފީސް

ތަފްސީލް ދެއްވަމުން ނާޒިމް ވިދާޅުވީ ބަލިވީމާ ބޭސްކުރަން ޖެހޭ ނިޒާމެއްގެ ތެރޭގައި އުޅެން ޖެހޭނެ ބޭނުންވާ މިސްރާބަށް ގައުމު ނުގެންދެވޭނެ ކަމަށެވެ. ބަލިވުމުގެ ކުރިން ބަލި ދެނެގަތުމަށް ހިލޭ މެޑިކަލް ޗެކަޕް ހެދޭނެ ގޮތާއި އެއާ އެމްބިއުލެންސްގެ ޚިދުމަތް މި ސަރުކާރުން ފެށީ އެހެންވެ ކަމަށް މިނިސްޓަރު ވިދާޅުވި އެވެ.

ސިއްހީ ނިޒާމް އިގްތިސާދަށް ބުރަޔަކަށް ވާގޮތަށް ކުރިއަށް ނުގެންދެވޭނެ ކަމަށާއި އާސަންދަ ރިފޯމް ކުރުމުގެ މަސައްކަތް މި ސަރުކާރުން ފެށީ އެ މަގްސަދުގައި ކަމަށް ވެސް ނާޒިމް ވިދާޅުވި އެވެ. އާސަންދަ އަށް ގެންނަ ބަދަލުތަކުގެ ސަބަބުން ރައްޔިތުންނަށް ބުރައަކަށް ވާނެ އެއްވެސްކަމެއް ނުކުރައްވާނެ ކަމުގެ ޔަގީންކަން ވެސް މިނިސްޓަރު ދެއްވި އެވެ. 

ރައީސުލްޖުމްހޫރިއްޔާގެ ނައިބް ހެލްތު އެކްސްޕޯ ހުޅުއްވައި ދެއްވަނީ. --ފޮޓޯ: ރައީސް އޮފީސް

ހެލްތު އެކްސްޕޯ ހުޅުއްވައި ދެއްވުމަށް ފަހު ރައީސުލްޖުމްހޫރިއްޔާގެ ނައިބު ވަނީ، އެކްސްޕޯ 2024 ގައި އާންމުންނަށް މައުލޫމާތު ފޯރުކޮށްދިނުމަށް ތައްޔާރުކޮށްފައިވާ ސްޓޯލްތަކަށް ޒިޔާރަތްކުރައްވައި، އެ ސްޓޯލްތައް ބައްލަވާލައްވައިފައެވެ. ހެލްތު އެކްސްޕޯ 2024 ގައި، ޞިއްޙީ ދާއިރާގެ އެކިއެކި ފަރާތްތަކުން ވަނީ ބައިވެރިވެފައެވެ. އެގޮތުން މާލެ ސަރަހައްދުގެ ހޮސްޕިޓަލްތަކާއި، ކްލިނިކްތަކާއި ޖަމިއްޔާ ޖަމާއަތްތަކާއެކު މި އެކްސްޕޯގައި ގާއިމުކޮށްފައިވާ 50 ސްޓޯލަކުން، އާންމުންނަށް މައުލޫމާތު ލިބޭނެ އިންތިޒާމު، ޞިއްޙަތާބެހޭ ވުޒާރާއިން ވަނީ ހަމަޖައްސަވައިދެއްވައިފައެވެ.

މިއަދު ހަވީރު 4-6 އަށް އަދި މިރޭ 8-11 އަށް އެކްސްޕޯ ހުޅުވާފައި ހުންނާނެ އެވެ.