ENGLISH

04 އޭޕްރީލު 2025

Advertisement

ރަހީނުން މިނިވަންނުކޮށްފިނަމަ ޓްރަމްޕްގެ ޣައްޒާ ހުސްކުރުމުގެ ޕްލޭނަށް ޢަމަލުކޮށްފާނެކަމުގެ އިންޒާރު

13 ފެބްރުއަރީ 2025

|

ހަސަން އާމިރު

ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމާ އެއްގޮތަށް ރަހީނުން މި ހަފްތާ ބަންދުގައި މިނިވަންނުކޮށްފި ނަމަ، ޙަމާސް ޖަމާޢަތާ ދެކޮޅަށް އާ ޢުދުވާނުތައް ފަށައި، އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ގޮތަށް، ޣައްޒާއިން ފަލަސްތީނުގެ ރައްޔިތުން ބޭލުމުގެ ޕްލޭނަށް ޢަމަލުކޮށްފާނެކަމުގެ އިންޒާރު އިޒްރޭލުން ދީފިއެވެ.

އިޒްރޭލުގެ ދިފާއީ ވަޒީރު، އިސްރާއީލް ކަޓްޒް މި އިންޒާރު ދިނީ، މިދިޔަ މަހުގެ 19 ވަނަ ދުވަހު ޢަމަލުކުރަން ފެށި ޙަމަލާތައް ހުއްޓައިލުމުގެ އެއްބަސްވުމާ އިޒްރޭލުން ޚިލާފުވެފައި ކަމަށް ބުނެ، އިތުރު ރަހީނުން މިނިވަންކުރުން ޙަމާސްއިން މަޑުޖައްސާލުމާ ގުޅިގެންނެވެ.

އެ އެއްބަސްވުމުގެ ދަށުން، ޙަމާސްއިން ރަހީނުކޮށްފައިވާ 21 މީހަކާއި، އިޒްރޭލުގެ ޖަލުތަކުން 700 އެއްހާ ފަލަސްތީނުގެ މީހުން ވަނީ ފަސް ފަހަރެއްގެ މަތިން މިނިވަންކޮށްފައެވެ.

ހަ ވަނަ ބުރުގެ ރަހީނުންނާއި ޤައިދީން މިނިވަންކުރަން ހަމަޖެހިފައި އޮތީ އަންނަ ހޮނިހިރު ދުވަހު އެވެ.

ރަހީނުން މިނިވަންނުކޮށްފިނަމަ، ޙަމާސް ނައްތާލާނެކަމަށް އިޒްރޭލާއި އެމެރިކާއިން ދެމުންދާ އިންޒާރުތަކަށް ނުގުޑާނެ ކަމަށް އެ ޖަމާޢަތުން ވަނީ ބުނެފައެވެ.

ސުލްޙައިގެ އެއްބަސްވުން އެކުލަވައިލުމުގެ އިސްކޮށް އުޅުނު ޤަތަރާއި މިޞްރުން ވަނީ މި އެއްބަސްވުން ސަލާމަތް ކުރެވޭތޯ މަސައްކަތް ފަށައިފައެވެ.

ކަޓްޒް ބުނީ، ޙަމަލާތައް އަލުން ފަށައިފިނަމަ، "ޙަމާސް ނައްތާލެވެންދެން އިޒްރޭލުން ހަނގުރާމަ ކުރިއަށް ގެންދާނެ" ކަމަށެވެ.

"އަދި ޣައްޒާ އާ މެދު ރައީސް ޓްރަމްޕް ގެންގުޅުއްވާ ތަސައްވަރު ހަޤީޤަތަކަށް ހެދުމުގެ ދޮރު ވެސް ހުޅުވޭނެ،" އޭނާ ބުންޏެވެ.

ޓްރަމްޕް އިޢުލާނުކުރައްވާފައިވާ ގޮތުގައި، މިހާރު ސުންނާފަތިވެފައި އޮތް ޣައްޒާއަށް، ވިސްނުމަށް ގެންނަން ވެސް އުނދަގޫ މިންވަރަށް ތަރައްޤީ އާއި ކުރިއެރުން ގެންނަވާނެއެވެ.

ނަމަވެސް، އެ ޕްލޭން ތަންފީޒުކުރުމަށްޓަކައި، ޣައްޒާގައި ދިރިއުޅޭ ފަލަސްތީނުގެ ރައްޔިތުން އެތަނުން ބާލައި، އެތަނަކީ އެމެރިކާގެ އަމިއްލަ ތަނަކަށް ހެދުމުގެ ވިސްނުން ވެސް ޓްރަމްޕް ވަނީ އިޢުލާނުކުރައްވައިފައެވެ.

ޓްރަމްޕްގެ އެ ވިސްނުން، އިސްލާމީ ޤައުމުތަކާއި ޔޫރަޕްގެ ގިނަ ޤައުމުތަކުން ވެސް ވަނީ ކުށްވެރިކޮށްފައެވެ.

ކިޔުންތެރިންގެ ހިޔާލު