ENGLISH

04 އޭޕްރީލު 2025

Advertisement

ސުލްޙައިގެ މަޝްވަރާއަށް ޓްރަމްޕް އާއި ޕޫޓިން ސައުދީގައި ބައްދަލުކުރައްވަނީ

13 ފެބްރުއަރީ 2025

|

ހަސަން އާމިރު

ޔޫކްރޭންއާ ދެކޮޅަށް ކުރަމުންދާ ހަނގުރާމަ ހުއްޓާލައި، ސުލްޙަ ޤާއިމުކުރުމުގެ މަޝްވަރާއަށް އެމެރިކާގެ ރައީސް ޑޮނަލްޑް ޓްރަމްޕް، ރަޝިޔާގެ ރައީސް ވްލޮޑޮމިޔަރ ޕޫޓިންއާ ސައުދީ އަރަބިއްޔާގައި ބައްދަލުކުރައްވަން ހަމަޖެހިއްޖެއެވެ.

ޓްރަމްޕް މި ކަން ހާމަކުރައްވާފައިވަނީ، ޕޫޓިންއާ އެކު ފޯނުން ގުޅުއްވައި ކުރެއްވި މަޝްވަރާތަކަށްފަހުއެވެ.

ހަނގުރާމަ ނިމުމަކަށް ގެނައުމަށްޓަކައި، ޔޫކްރޭނާ އެކު އެމެރިކާއިން މަޝްވަރާ ނުކުރާނެ ކަމަށް އިވެމުންދާ އަޑުތައް ވެސް ޓްރަމްޕް ވަނީ ދޮގުކުރައްވައިފައެވެ.

ދެވަނަ ދައުރަކަށް އެމެރިކާގެ ރައީސްކަމަށް ވަޑައިގެންނެވި ޓްރަމްޕް ވަނީ ރަޝިޔާ-ޔޫކްރޭނުގެ ހަނގުރާމަ ނިންމުމަކަށް ގެންނަން އަމާޒު ހިއްޕަވައިފައެވެ.

މިގޮތުން، ވެރިކަމަށް ވަޑައިގަންނަވަތާ 24 ގަޑިއިރުގެ ތެރޭގައި އެ ހަނގުރާމަ ނިމުމަކަށް ގެންނަވާނެ ކަމަށް، ރިޔާސީ ކެމްޕޭނުގެ ތެރޭގައި ޓްރަމްޕް ވަނީ ވިދާޅުވެފައެވެ.

"ޕޫޓިން ވެސް މި ތަނަށް [އެމެރިކާ] ވަޑައިގަންނަވާނެ، އަދި އަޅުގަނޑު ވެސް އެކޮޅަށް [ރަޝިޔާ] އަށް ދާނަން. އެކަމަކު އަޅުގަނޑުމެން ދެ މީހުންގެ ފުރަތަމަ ބައްދަލުވުން އެންމެ ގާތީ ސައުދީގައި ބޭއްވުން،" ޓްރަމްޕް ވިދާޅުވިއެވެ.

މި މަޝްވަރާތަކުގައި ސައުދީ ވެސް ބައިވެރިވާނެކަމުގެ އިޝާރާތެއް ޓްރަމްޕް ދެއްވިއެވެ.

ރަޝިޔާއިން ބުނީ، ޕޫޓިން އާއި ޓްރަމްޕް، ދޮޅު ގަޑިއިރެއްހާއިރު ފޯނުން މަޝްވަރާ ކުރެއްވި ކަމަށެވެ. އަދި އެމެރިކާ އާއި ރަޝިޔާ ގުޅިގެން މަސައްކަތް ކުރުމުގެ ވަގުތު ޖެހިފައިވާ ކަމަށް ދެ ލީޑަރުން ވެސް އެއްބަސްވެވަޑައިގެންނެވި ކަމަށް ރަޝިޔާއިން ބުންޏެވެ.

ކިޔުންތެރިންގެ ހިޔާލު