ފަލަސްތީނުގެ ޣައްޒާގެ އުތުރާއި ދެކުނު ވަކިކޮށްފައި އޮންނަ ސަރަޙައްދުން އިޒްރޭލު ސިފައިން ފައިބަން ފަށައިފިއެވެ.

ޣައްޒާގެ އުތުރާއި ދެކުނު ވަކި ކުރުމަށް 'ނެޓްޒަރީމް ކޮރިޑޯ'ގެ ނަމުގައި އިޒްރޭލު ސިފައިން ޗެކްޕޮއިންޓެއް ޤާއިމުކޮށްފައި ވަނީ 2023 ވަނަ އަހަރުގެ އޮކްޓޯބަރު މަހު، ޙަމާސް ޖަމާޢަތް ނައްތާލުމުގެ ނަމުގައި އިޒްރޭލު ސިފައިން ފެށި ހަނގުރާމައިގެ ތެރެއިންނެވެ.

އެ ސަރަޙައްދުން އިޒްރޭލު ސިފައިން ފައިބަން ފަށާފައިމިވަނީ، ޙަމާސް އާއި އިޒްރޭލާ ދެމެދު މިހާރު ޢަމަލުކުރަމުންދާ ޙަމަލާތައް ހުއްޓައިލުމުގެ އެއްބަސްވުމުގެ ދަށުންނެވެ.

އިޒްރޭލުން ޣައްޒާއަށް ހުއްޓުމެއް ނެތި ޙަމަލާތައް ދޭން ފެށިތާ 15 މަސް ދުވަސް ފަހުން، ގިނަ ޤައުމުތަކެއް މެދުވެރިވެގެން، ސުލްޙައިގެ އެއްބަސްވުމެއް އެކުލަވާލައި، ޢަމަލުކުރަން ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

ތިން ފިޔަވައްސަކަށް ބަހާލާފައިވާ މި އެއްބަސްވުމުގެ ފުރަތަމަ މަރުޙަލާގައި، ޙަމާސްއިން ރަހީނުކޮށްފައިވާ މީހުންނާއި އިޒްރޭލުގެ ޖަލުތަކުގައި ތިބި ފަލަސްތީނުގެ ރައްޔިތުން މިނިވަންކުރުމުގެ އިތުރުން، ޣައްޒާގައި އާންމުން ދިރިއުޅޭ ސަރަޙައްދުތަކުން އިޒްރޭލު ސިފައިން ފޭބުން ހިމެނެއެވެ.

އެއްބަސްވުމުގެ ފުރަތަމަ ފިޔަވަހީގެ ދަށުން 33 ރަހީނުން މިނިވަންކުރަން ހަމަޖެހިފައިވާއިރު، އިޒްރޭލުގެ ޖަލުތަކުން 1،900 އެއްހާ ފަލަސްތީނުގެ ޤައިދީން މިނިވަންކުރާނެ ކަމަށް މަޢުލޫމާތު ލިބިފައިވެއެވެ.