ޗައިނާގެ ހުޅަނގު ދެކުނުގައި އޮންނަ ސިޗުއަން ސަރަޙައްދަށް ބޯކޮށް ވާރޭވެހުމުގެ ސަބަބުން، ބޮޑު ހިސާބެއްގައި ބިންގަނޑު ކަނޑައިގެން ގޮސް، އެތައް ބަޔަކު ގެއްލިގެން ހޯދަން ފަށައިފިއެވެ.

ޗައިނާއަށް މި ފަހުން މޫސުމީ ގިނަ ކާރިސާތަކެއް ކުރިމަތިވެފައިވާއިރު، ބޯކޮށް ވާރޭވެހި ފެންބޮޑުވެގެން އެތައް ބަޔަކު ވަނީ މަރުވެފައެވެ.

ޗައިނާގެ ކަމާގުޅޭ އިދާރާތަކުން ބުނި ގޮތުގައި، ސިޗުއަންގެ ޖިންޕިން އަވަށުގައި ބިންގަނޑު ކަނޑައިގެން ގޮސް، އެތައް ބަޔަކު ގެއްލިގެން ވަނީ ރިޕޯޓުކޮށްފައެވެ.

ބިންގަނޑު ކަނޑައިގެން ގޮސްފައިވަނީ، ގިނަ ދުވަސްތަކެއް ވަންދެން މެދުނުކެނޑި ވާރޭވެހުމުގެ ސަބަބުން ކަމަށް ކަމާގުޅޭ އިދާރާތަކުން ވަނީ ބުނެފައެވެ.

މި ހާދިސާގައި ގެއްލިގެން ރިޕޯޓުކޮށްފައިވަނީ 30 މީހެއް ކަމަށާއި، އެ މީހުން ހޯދުމުގެ މަސައްކަތް ކުރަމުންދާ ކަމަށް ވެސް ބުނެފައިވެއެވެ.

މޫސުމީ މިފަދަ ކާރިސާތައް މެދުވެރިވުން އަވަސްވެފައި ވަނީ މޫސުމީ ބަދަލުތަކުގެ ސަބަބުން ކަމަށް ސައިންސްވެރިން ވަނީ ލަފާކޮށްފައެވެ.