އިންޑިޔާގެ ވެރިރަށް ނިއު ދިއްލީގައި އޮތް އިދިކޮޅުގެ ބާރު ކަނޑުވައިލުމަށްފަހު، ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތަ ޕާޓީ (ބީޖޭޕީ) އިން އާންމު އިންތިޚާބު ކާމިޔާބުކޮށްފިއެވެ.

މިއީ 27 އަހަރަށްފަހު ބީޖޭޕީއަށް ދިއްލީ ކާމިޔާބުވި ފުރަތަމަ ފަހަރެވެ.

ބީޖޭޕީން ދިއްލީގެ ހިންގުން ކާމިޔާބުކޮށްފައިވަނީ، އިދިކޮޅު އާމް އާދުމީ ޕާޓީ (އޭއޭޕީ)ގެ މައްޗަށް ކުރި ހޯދުމަށްފަހުއެވެ. މިގޮތުން، އޭއޭޕީގެ ލީޑަރު އަރްވިންދު ކެޖްރިވާލްގެ އިތުރުން ޑެޕިޔުޓީ ލީޑަރު މަނީޝް ސިސޯޑިޔާއަށް ވެސް މި އިންތިޚާބުގައި ވަނީ ނާކާމިޔާބުވެފައެވެ.

މިގޮތުން، ދިއްލީގެ ޤާނޫނު ހަދާ މަޖިލީހުގެ 70 ގޮނޑީގެ ތެރެއިން، ބީޖޭޕީން ވަނީ 48 ގޮނޑި ކާމިޔާބުކޮށްފައެވެ. އޭގެ ބަދަލުގައި، އޭއޭޕީއަށް ލިބިފައިވަނީ އެންމެ 22 ގޮނޑިއެވެ. މިއީ 2020 ވަނަ އަހަރުގެ އިންތިޚާބުގައި 63 ގޮނޑި ކާމިޔާބުކުރި އޭއޭޕީއަށް ކުރިމަތިވި ބޮޑު ނާކާމިޔާބީއެކެވެ.

ގާތްގަނޑަކަށް 33 މިލިއަން މީހުންގެ އާބާދީއެއް އޮންނަ ދިއްލީ ކާމިޔާބުވުމަކީ މޯދީގެ ބީޖޭޕީއަށް ލިބުނު ބޮޑު ހިތްވަރެކެވެ. އެއީ މިދިޔަ އަހަރުގެ ޖޫން މަހު ބޭއްވި އާންމު އިންތިޚާބުގައި ޕާލިމަންޓު މެޖޯރިޓީ ގެއްލި، ކުދި ޕާޓީތަކާ އެކު އިއްތިހާދު ސަރުކާރެއް އެކުލަވައިލަން ބީޖޭޕީއަށް މަޖުބޫރުވުމާ ގުޅިގެންނެވެ.

ނަމަވެސް، އޭގެފަހުން ބޭއްވި މައި އިންތިޚާބުތައް ބީޖޭޕީން މި ވަނީ ފަސޭހަކަމާ އެކު ކާމިޔާބުކޮށްފައެވެ. ދިއްލީގެ އިތުރުން ހަރްޔާނާ އަދި މަހަރާޝްތުރާ ވެސް މިދިޔަ ހަތް މަސް ދުވަހުގެ ތެރޭގައި ބީޖޭޕީން ވަނީ ކާމިޔާބުކޮށްފައެވެ.