ENGLISH
06 އޭޕްރީލު 2025
ކެރީބިއަން އަށް ބޮޑު ބިންހެލުމެއް، ސުނާމީގެ ނުރައްކާ ކުޑަވެއްޖެ
09 ފެބްރުއަރީ 2025
|
އެންމެ މަޤްބޫލު
ކެރީބިއަން ކަނޑުގެ ހޮންޑިއުރަސް އާއި ކޭމަން އައިލެންޑްސް އާ ދެމެދަށް ބާރުގަދަ ބިންހެލުމެއް އައުމާ ގުޅިގެން ހޮނިހިރު ދުވަހުގެ ހަވީރުގެ ވަގުތެއްގައި ޕޯޓަ ރިކޯ އާއި ކައިރި ރަށްތަކަށް ނެރުނު ސުނާމީގެ އިންޒާރު ކެންސަލްކޮށް ނުރައްކާ ކުޑަވެއްޖެކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން އިއުލާންކޮށްފިއެވެ.
މިއީ މިދިޔަ ހަތަރު އަހަރުގެ ތެރޭގައި އެ ސަރަހައްދަށް އައި އެންމެ ބާރުގަދަ ބިންހެލުމެވެ.
އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން މި ބިންހެލުމުގެ ބާރުމިނުގައި 7.6 މެގްނިޓިއުޑް ހުރި ކަމަށް ރިޕޯޓްކޮށްފައިވާއިރު، ޖަރުމަނުގެ ރިސާޗް ސެންޓަރ ފޯ ޖިއޯސައިންސް އިން ވަނީ 7.5 މެގްނިޓިއުޑްގެ ބިންހެލުމެއް އައިސްފައިވާ ކަމަށް ބުނެފައެވެ.
އެމެރިކާގެ ސުނާމީ އިންޒާރުދޭ ނިޒާމުން އެންމެ ފުރަތަމަ ލަފާކުރީ ކިއުބާއަށް 3 މީޓަރާއި ހޮންޑިއުރަސް އާއި ކޭމަން އައިލެންޑްސްއަށް 0.3 މީޓަރާއި 1 މީޓަރާއި ދެމެދުގެ ރާޅުތަކެއް އަރާނެ ކަމަށެވެ. ނަމަވެސް ފަހުން ސުނާމީގެ އެއްވެސް ނުރައްކާތެރިކަމެއް ފާހަގަވެފައި ނުވެއެވެ.
ބިންހެލުމާ ގުޅިގެން އެމެރިކާގެ ސުނާމީ އިންޒާރުދޭ ނިޒާމުން ވެސް ވަނީ ޕޯޓަ ރިކޯ އާއި ވާޖިން އައިލެންޑްސް އަށް އެޑްވައިޒަރީތައް ނެރެފަ އެވެ. އެއްގަމުން އެއްވެސް ޙަރަކާތެއް ފާހަގަވެފައިނުވާއިރު، އެއްވެސް ކަހަލަ ގެއްލުމެއް ލިބުނުކަންވެސް ރިޕޯޓުކޮށްފައިނުވެއެވެ.
ބިންހެލުން އައިތާ ގާތްގަނޑަކަށް ތިން ގަޑިއިރު ފަހުން އެމެރިކާގެ ކަމާބެހޭ ފަރާތްތަކުން ވަނީ 30 ސެންޓިމީޓަރަށް ކަނޑުގެ ލޮނުގަނޑު އުފުލޭނެކަމަށް އިންޒާރު ދީފައެވެ.
މެކްސިކޯގެ އިރުމަތީ އައްސޭރިފަށުގައި ވާ އިސްލާ މުޖެރޭސްގެ ސުނާމީ ދެނެގަންނަ ނިޒާމަށް، އެންމެ އުސްމިނުގައި ހަތަރު ސެންޓިމީޓަރު (0.1 ފޫޓު) ހުރި ރާޅެއް ފެނިފައިވާ ކަމަށް އެމެރިކާގެ ސުނާމީ ވޯނިން ސެންޓަރުން ބުނެފައިވެއެވެ.
އެމެރިކާގެ ނޭޝަނަލް އޯޝަނިކް އެންޑް އެޓްމޮސްފިރިކް އެޑްމިނިސްޓްރޭޝަނުން ބުނީ މި ބިންހެލުމަކީ 2021 ވަނަ އަހަރު ހެއިޓީއަށް 7.2 މެގްނިޓިއުޑްގެ ބިންހެލުމެއް އައި ފަހުން، އެ ސަރަހައްދަށް އައި އެންމެ ބޮޑު ބިންހެލުން ކަމަށެވެ.