ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމުގެ ފަސް ވަނަ ބުރުގައި ހިމެނޭ ރަހީނުންނާއި ޤައިދީން ރޭ މިނިވަންކޮށްފިއެވެ.

ޙަމާސް ޖަމާޢަތުން ރަހީނުކޮށްފައިވާ ތިން މީހަކު ރޭގެ ވަގުތެއްގައި މިނިވަންކޮށްފައިވާއިރު، އޭގެ ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ 183 ޤައިދީން ވަނީ ދޫކޮށްލައިފައެވެ.

އިޒްރޭލުން ޣައްޒާއަށް ހުއްޓުމެއް ނެތި ޙަމަލާތައް ދޭން ފެށިތާ 15 މަސް ދުވަސް ފަހުން، ގިނަ ޤައުމުތަކެއް މެދުވެރިވެގެން، ސުލްޙައިގެ އެއްބަސްވުމެއް އެކުލަވާލައި، ޢަމަލުކުރަން ފަށާފައިވަނީ މިދިޔަ މަހުގެ 19 ވަނަ ދުވަހުއެވެ.

ރޭ ދޫކޮށްލި ޤައިދީންނަށް ޖަލުގައި އަނިޔާކޮށްފައިވާ ކަމަށާއި، ހަތް މީހަކަށް ހޮސްޕިޓަލުގައި ފަރުވާދޭންޖެހުނު ކަމަށް ޙަމާސް އިން ބުންޏެވެ.

އެ އެއްބަސްވުމުގެ ދަށުން، ޙަމާސްއިން ރަހީނުކޮށްފައިވާ 18 މީހަކާއި، އިޒްރޭލުގެ ޖަލުތަކުން 600 އެއްހާ ފަލަސްތީނުގެ މީހުން ވަނީ ހަތަރު ފަހަރެއްގެ މަތިން މިނިވަންކޮށްފައެވެ.

އެއްބަސްވުމުގެ ފުރަތަމަ ފިޔަވަހީގެ ދަށުން 33 ރަހީނުން މިނިވަންކުރަން ހަމަޖެހިފައިވާއިރު، އިޒްރޭލުގެ ޖަލުތަކުން 1،900 އެއްހާ ފަލަސްތީނުގެ ޤައިދީން މިނިވަންކުރާނެ ކަމަށް މަޢުލޫމާތު ލިބިފައިވެއެވެ.