އެމެރިކާގެ ރައީސް ޑޮނަލްޑް ޓްރަމްޕް އިސްވެ، ދަތިކުރުމުގެ ފިޔަވަޅުތައް އަޅާފައިވާ އެމެރިކާ އާ އެކު ކުރާނެ އެއްވެސް މަޝްވަރާއެއް ނެތް ކަމަށް އީރާނުން ބުނެފިއެވެ.

ޓްރަމްޕްގެ ފުރަތަމަ ވެރިކަމުގައި ވަނީ 2015 ވަނަ އަހަރު އީރާނާއި ދުނިޔޭގެ ބޮޑެތި ބާރުތަކާ ދެމެދު ވެފައިވާ ނިއުކްލިއަރ އެއްބަސްވުމުން އެމެރިކާ ވަކި ކޮށްފައެވެ. އެއަށް ފަހު އީރާނާ ދެކޮޅަށް ދަތިކުރުމުގެ ފިޔަވަޅުތަކެއް އަޅައިފައެވެ. އެމެރިކާއިން އެ ގޮތަށް ޢަމަލު ކުރުމުން އީރާނުން ވަނީ ނިއުކްލިއަރ އެއްބަސްވުމާ ޚިލާފަށް ޢަމަލު ކުރަން ފަށައި، ނިއުކްލިއަރ ބާރަކަށް ވުމުގެ މަސައްކަތް އަވަސްކޮށްފައެވެ.

ޓްރަމްޕް ދެވަނަ ފަހަރަށް އެމެރިކާގެ ރައީސްކަމަށް ވަޑައިގެން، އީރާނާ އެކު އަލުން އެއްބަސްވުމެއް ހަދަން ބޭނުންވާ ކަމަށް ވަނީ ވިދާޅުވެފައެވެ.

އެކަމާ ގުޅިގެން އީރާނުގެ ރޫހާނީ ލީޑަރު އާޔަތުالله ޢަލީ ޚާމަނާއީ ވިދާޅުވީ ޓްރަމްޕްގެ ކުރީގެ ސަރުކާރަކީ ވަޢުދަށް ކަމޭހިތާފައިވާ ސަރުކާރެއް ނޫން ކަމަށެވެ. އެމެރިކާ އާއެކު ކަންކަމާ ގުޅޭ ގޮތުން މަޝްވަރާ ކޮށް ޙައްލު ހޯދަން މަސައްކަތްކުރުމަކީ ބުއްދިވެރި ކަމެއް ނޫން ކަމަށް އޭނާ ވިދާޅުވިއެވެ.

ޚާމަނާއީ އިތުރަށް ވިދާޅުވީ އެމެރިކާއިން އީރާނަށް ޙަމަލާ ދީފިނަމަ އީރާނުން ވެސް އެމެރިކާއަށް އަމާޒުކޮށް ޙަމަލާ ދޭނެ ކަމަށެވެ. އީރާނުގެ ސަލާމަތަށް ނުރައްކާ ކުރާނެ ކަމުގެ އިންޒާރު އެމެރިކާއިން ދީފިނަމަ ހަމަ އެ ގޮތަށް އީރާނުން ވެސް ޢަމަލު ކުރާނެ ކަމަށް އޭނާ ވިދާޅުވިއެވެ.