ENGLISH

04 އޭޕްރީލު 2025

Advertisement

ޝެއިޚް ހަސީނާގެ އާއިލީ ގެކޮޅުގައި ހުޅުޖަހައިިފި

07 ފެބްރުއަރީ 2025

|

ހަސަން އާމިރު

ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާގެ އާއިލީ ގެކޮޅުގައި ހުޅުޖަހައިފިއެވެ.

ބަންގްލަދޭޝްގައި އެތަކެއް ހާސް ދަރިވަރުންތަކެއް ނުކުމެ ކުރި މުޒާހަރާތަކަށްފަހު، ބޮޑުވަޒީރު ޝެއިޚް ހަސީނާގެ ވެރިކަން ވެއްޓުމުން، އިންތިޤާލީ ސަރުކާރެއް ޤާއިމުކުރީ މިދިޔަ އޯގަސްޓު މަހުއެވެ.

ޔުނިވާރސިޓީގެ ދަރިވަރުން އިސްވެ ކުރި މުޒާހަރާއަށް ފަހު، ހެލިކޮޕްޓަރެއްގައި ހަސީނާ ޤައުމު ދޫކުރައްވާ، އިންޑިޔާއަށް ވަޑައިގެންނެވީ، މުޒާހަރާގެ ބައިވެރިން ރިޔާސީ ގަނޑުވަރަށް ވަދެގަތުމުންނެވެ.

ޤައުމުން ބޭރުގައި ހުންނަވާ ރައްޔިތުންނާއި ސަޕޯޓަރުންނާ މުޚާތަބު ކުރައްވާ ޚިޠާބެއް ދެއްވުމަށް ހަސީނާ ނިންމެވުމުން އެ ގަޑިއާ ދިމާކޮށް ހަސީނާގެ އާއިލީ ގެކޮޅު ކައިރިއަށް އެކަމަނާ އާ ދެކޮޅު އެތައް ހާސް ބަޔަކު އެއްވިއެވެ.

އެ ޚިޠާބުގައި އެކަމަނާ ވަނީ އިންތިޤާލީ ސަރުކާރުން ވެރިކަންކުރަނީ ދުސްތޫރީ ހަމަތަކާ ޚިލާފަށް ކަމަށް ވިދާޅުވެ، އެ ވެރިކަމާ ދެކޮޅަށް ތެދުވުމަށް ޤައުމުގެ ރައްޔިތުންނަށް ގޮވާލައްވައިފައެވެ.

އިންތިޤާލީ ސަރުކާރާ ދެކޮޅަށް އެހެން ވިދާޅުވުމާ އެކު، އިދިކޮޅު ސަޕޯޓަރުން ވަނީ އެކަމަނާގެ ގެކޮޅަށް ވަދެގަނެ، ގޭގެ ތަކެއްޗަށް ގެއްލުންދީ، އެންމެފަހުން އެތަނުގައި ރޯކޮށްލައިފައެވެ.

އެ ގެއަކީ، ހަސީނާގެ ބައްޕާފުޅު އަދި ބަންގްލަދޭޝްގެ ބާނީ ޝައިޚް މުޖީބުއްރަޙްމާނުގެ ގެކޮޅެވެ.

މުޖީބުއްރަޙްމާނަކީ ބަންގްލަދޭޝްގެ ފުރަތަމަ ރައީސެވެ. 1971 ވަނަ އަހަރު ޕާކިސްތާނުގެ ކިބައިން ބަންގްލަދޭޝް މިނިވަން ކުރެއްވުމަށް އޭނާ ވަނީ މުހިންމު ދައުރެއް އަދާ ކުރައްވައިފައެވެ. މުޖީބުއްރަޙްމާންގެ ގެކޮޅަކީ ބަންގްލަދޭޝްގެ ތާރީޚާ ގުޅިފައިވާ ޚާއްސަ ގެއެކެވެ. 1975 ވަނަ އަހަރު އޭނާ އާއި އޭނާގެ ޢާއިލާގެ ގިނަ ޢަދަދެއްގެ މީހުން ވަނީ އެ ގޭގައި އަވަހާރަ ކޮށްލައިފައެވެ.

ހަސީނާ ފަހުން ވަނީ ބައްޕާފުޅުގެ ހަނދާނުގައި އެ ގެކޮޅު ދާރުލް އާސާރަކަށް ބަދަލު ކުރައްވައިފައެވެ.

ކިޔުންތެރިންގެ ހިޔާލު