ޤާނޫނާ ޚިލާފަށް އެމެރިކާ އާއި އިޒްރޭލާ ދެކޮޅަށް ޢަމަލުކުރަމުންދާ ކަމަށް ވިދާޅުވެ، އިންޓަރނޭޝަނަލް ކްރިމިނަލް ކޯޓު (އައިސީސީ) އާ ދެކޮޅަށް ފިޔަވަޅު އެޅުމުގެ ޤަރާރެއްގައި އެމެރިކާގެ ރައީސް ޑޮނަލްޑް ޓްރަމްޕް ސޮއިކުރައްވައިފިއެވެ.

ޓްރަމްޕް މި ޤަރާރުގައި ސޮއިކުރައްވާފައިވަނީ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، އެމެރިކާއަށް ރަސްމީ ދަތުރެއް ކުރަމުން ގެންދާ ދަނޑިވަޅެއްގައެވެ.

އެ ޤަރާރުގެ ދަށުން، އެމެރިކާ އާއި އިޒްރޭލާ ދެކޮޅަށް އައިސީސީން ކުރިއަށް ގެންދާ ތަހުޤީޤުތަކަށް އެއްބާރުލުން ދޭ ފަރާތްތަކާއި އެ މީހުންގެ އާއިލާތަކަށް ވިސާ ދިނުމަށް ދަތިކުރުމާއި މާލީ ގޮތުން ދަތިކުރުމުގެ ފިޔަވަޅުތައް އެޅުން ހިމެނެއެވެ.

ޓްރަމްޕް އިސްވެ ހުންނަވައި އައިސީސީ އާ ދެކޮޅަށް ފިޔަވަޅު އަޅުއްވާފައިމިވަނީ، ފަލަސްތީނުގެ ޣައްޒާގައި ޙަމާސް ޖަމާޢަތާ ދެކޮޅަށް ކުރި ހަނގުރާމައިގެ ތެރެއިން ރަހުމުކުޑަ ޖަރީމާތައް ހިންގި ކަމަށް ބުނެ، ނަތަންޔާހޫ ހައްޔަރުކުރުމުގެ އަމުރެއް މިދިޔަ އަހަރުގެ ނޮވެމްބަރު މަހުގެ ތެރޭގައި އެ ކޯޓުން ނެރެފައިވަނިކޮށެވެ.

އެމެރިކާ އަކީ އައިސީސީގެ މެމްބަރެއް ނޫނެވެ. އެހެންކަމުން، އެ ކޯޓުގެ އިޙްތިޞާސެއް އެމެރިކާ އާއި އެމެރިކާގެ ރައްޔިތުންގެ މައްޗަށް ނުހިނގާނެ ކަމަށް އެމެރިކާއިން ދަނީ ބުނަމުންނެވެ.