ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މާލިމީކަމުގެ ދަށުން، އެންމެންގެ އެއްބާރުލުމާއެކު ދިވެހިރާއްޖޭގައި ހުރި އިޖްތިމާޢީ މައްސަލަތަކާއި އިޤްތިސާދީ މައްސަލަތަކުގެ އިތުރުން ޤައުމީ ބޮޑެތި މައްސަލަތައް ހައްލުކުރެވޭނެކަމުގެ ޔަޤީންކަން އެބައޮތްކަމަށް ހެންވޭރު އުތުރު ދާއިރާގެ މަޖިލިސް މެމްބަރު އަޙްމަދު އައިފާން ވިދާޅުވެއްޖެއެވެ.

ރައީސް އިއްޔެ ދެއްވި ރިޔާސީ ބަޔާނާ ގުޅިގެން "އެމްއެމްޓީވީ" އަށް ދެއްވި އިންޓަވިއުއެއްގައި މެމްބަރު ވިދާޅުވީ އިޖްތިމާއީ ބޮޑެތި މައްސަލަތައް ކަމަށްވާ މަސްތުވާތަކެތީގެ މައްސަލައާއި ގޭންގު ކުށްތަކާއި މާރާމާރީގެ މައްސަލަތައް މަދުކުރުމަށް ޓަކައި ކުރެވެމުންދާ މަސައްކަތް ޢަމަލީގޮތުން ފެންނަމުންދާ ކަމަށެވެ. 

މެމްބަރު އައިފާނު އިތުރަށް ވިދާޅުވީ ރިޔާސީ ބަޔާން އިއްވަމުންދިޔަ ވަގުތު އެމްޑީޕީގެ މެމްބަރުން މަޖިލީހުގެ ތަޅުމުގައި އަޑުގަދަކޮށް ހަމަނުޖެހުންތައް ހިންގުމަށް މަސައްކަތް ކުރުމަކީ އާކަމެއް ނޫންކަމަށާއި، އެމްޑީޕީގެ ޢަމަލުތަކުން ފެނިގެން ދަނީ ދިވެހި ރައްޔިތުންނާއި ދިވެހިރާއްޖެއަށް ލާބައާއި މަންފާ ލިބޭނެ ހުރިހާ ކަމަކަށް ހުރަސްއެޅުމަށް މަސައްކަތްކުރާ މަންޒަރު ކަމަށެވެ. 

މަޖިލީހުގެ މެމްބަރުން ވެސް ރައީސުލްޖުމްހޫރިއްޔާގެ ވަޢުދުތައް ފުއްދުމަށް ޓަކައި ސާބިތުކަމާއެކު ތިބޭނެކަމަށް ވެސް މެމްބަރު އައިފާނުގެ ވާހަކަފުޅުގައި ފާހަގަކުރެއްވިއެވެ.