ފަލަސްތީނުގެ ޣައްޒާ އަލުން ބިނާކޮށް، ތަރައްޤީ ކުރުމަށްޓަކައި، އެ ސިޓީގައި ދިރިއުޅޭ ރައްޔިތުން ބާލައި، އެތަން އަމިއްލަކުރުމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާނުކުރެއްވި ޕްލޭނަށް ދުނިޔޭގެ ގިނަ ޤައުމުތަކުގެ ފާޑުކިޔުން އަމާޒުވުމުން، އެމެރިކާ ސަރުކާރުގެ ރާގު ބަދަލުކޮށްލައިފި އެވެ.

ޓްރަމްޕް އިޢުލާނުކުރެއްވި ގޮތުގައި، މިހާރު ސުންނާފަތިވެފައި އޮތް ޣައްޒާއަށް، ވިސްނުމަށް ގެންނަން ވެސް އުނދަގޫ މިންވަރަށް ތަރައްޤީ އާއި ކުރިއެރުން ގެންނަވާނެއެވެ.

ނަމަވެސް، އެ ޕްލޭން ތަންފީޒުކުރުމަށްޓަކައި، ޣައްޒާގައި ދިރިއުޅޭ ފަލަސްތީނުގެ ރައްޔިތުން އެތަނުން ބާލައި، އެތަނަކީ އެމެރިކާގެ އަމިއްލަ ތަނަކަށް ހެދުމުގެ ވިސްނުން ވެސް ޓްރަމްޕް ވަނީ އިޢުލާނުކުރައްވައިފައެވެ.

"އެމެރިކާއިން ޣައްޒާއާ ހަވާލުވެ، އަޅުގަނޑުމެން މަސައްކަތްތަކެއް ވެސް ކުރާނަން. އަޅުގަނޑުމެން އެތަން އަމިއްލަކުރާނަން،" ޓްރަމްޕް ވިދާޅުވިއެވެ.

ޓްރަމްޕްގެ އެ ވިސްނުން، އިސްލާމީ ޤައުމުތަކާއި ޔޫރަޕްގެ ގިނަ ޤައުމުތަކުން ވެސް ވަނީ ކުށްވެރިކޮށްފައެވެ.

ޖަރުމަނުވިލާތާއި ޗައިނާ އަދި ރަޝިޔާއިން ބުނީ، ޓްރަމްޕްގެ ހުށަހެޅުމާ އެކު، އެމެރިކާއަށް އޮތް ނަފުރަތު އެތަކެއް ގުނައަކަށް އިތުރުވެގެން ދާނެ ކަމުގައެވެ. އަދި، އެތަކެއް ސަތޭކަ ހާސް ބަޔަކު އަނިޔާއަށް ހުށަހެޅިގެންދާނެ ކަމަށެވެ.

ޣައްޒާގެ ރައްޔިތުން އެ މީހުންގެ އަމިއްލަ ވަޒަނުން ބޭލުމަކީ، ފަލަސްތީނުގެ ރައްޔިތުންގެ ނަޞްލު ނައްތާލުމުގެ ޢަމަލެއްގެ ގޮތުގައި އދ.އިން ވެސް ވަނީ ސިފަކޮށްފައެވެ.

އެފަދަ ބޮޑެތި ފާޑުކިޔުންތައް އަމާޒުވުމުން، ވައިޓް ހައުސްގެ ތަރުޖަމާނު ކެރޮލައިން ލެވިޓް ވިދާޅުވީ އެއީ އާންމު ވިސްނުމުގެ ބޭރުން ހުށަހަޅާފައިވާ ހުށަހެޅުމެއް ކަމުގައެވެ. އަދި ޣައްޒާގެ ރައްޔިތުން އަމިއްލަ ވަޒަނުން ބޭރު ކުރާނީ ވަގުތީ ގޮތުން ކަމަށާއި ޣައްޒާ އަލުން ބިނާކޮށް ނިންމުމުން އެ މީހުންނަށް އެނބުރި ވަޒަނަށް ދެވޭނެ ކަމުގައި ވެސް އޭނާ ވިދާޅުވިއެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ވެސް ވިދާޅުވީ، ޣައްޒާގެ ރައްޔިތުން އެހެން ޤައުމުތަކަށް ބަދަލު ކުރުމަށް ޓްރަމްޕް ހުށަހަޅުއްވާފައި ވަނީ ވަގުތީ ގޮތުން ކަމަށެވެ.

އެމެރިކާގެ ރައީސްކަމަށް ދެވަނަ ދައުރަކަށް ވަޑައިގެން، ޓްރަމްޕް ގެންދަވަނީ ޣައްޒާއިން މީހުން ބާލައިގެން، މިޞްރާއި ޖޯޑަން އަށް ގެންދަން ތަކުރާރުކޮށް ބާރު އަޅުއްވަމުންނެވެ.

ނަމަވެސް، އެ ދެ ޤައުމުން ވެސް ވަނީ އެކަމަށް އެއްބާރުލުން ނުދޭނެ ކަމަށް ބުނެފައެވެ.