ބިއުރޯ އޮފް ސްޓެޓިސްޓިކްސްއިން މީގެ ކުރިން ބުނެފައި ވަނީ ދަރިވަރުންނަށް ކިޔަވައިދޭ ޓީޗަރުންގެ އާބާދީގެ 20 ޕަސެންޓަކީ އެއްވެސް ފަންނީ ތަމްރީނެއް ލިބިފައިނުވާ މުދައްރިސުންކަމުގައެވެ. ނަމަވެސް ރާއްޖޭގެ އެކި ކަންކޮޅުތަކުގައި މުދައްރިސުންގެ ދަތިކަން ހައްލުކުރުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުދައްރިސުން ތަމްރީނުކުރުމުގެ ޤައުމީ ޕްރޮގްރާމެއް ފައްޓަވާދެއްވާ އެމަނިކްފާންގެ ރިޔާސީ މުހިންމު ވައުދު ފުއްދަވާ ދެއްވުމަކީ ހަޤީގަތުގައި ރާއްޖޭގެ ތަޢުލީމީ ދާއިރާއަށް ބޮޑު ބަދަލެއް ގެނެސްދޭނެ ކަމެކެވެ. މިއީ ރާއްޖޭގައި ދެމެހެއްޓެނި ގޮތެއްގައި މުދަރިސުން ބާރުވެރިކުރުވައިދޭ ފިޔަވަޅެކެވެ.

ފެށިގެން މިދިޔަ ޕްރޮގްރާމާއި އެކު ދަރިވަރުންނަށް ގްރޭޑް 11 އިން ފެށިގެން މި ޕްރޮގްރާމްގައި ބައިވެރިވެވޭނެ މަގު ފަހިވެފަ އޮތުމަކީ މުދައްރިސުންގެ ގޮތުގައި ކްލާސްރޫމްތަކަށް ވަނުމުގެ ކުރިން ދިގު މުއްދަތެއްގެ ތަމްރީނު ލިބިފައިވާ ތަޖުރިބާހުރި މުދައްރިސުންތަކެއް ބިނާ ކުރެވޭނެ ފުރުސަތެކެވެ.

ރާއްޖޭގައި ކިޔަވައިދެމުން އަންނަ މުދައްރިސުންގެ ތެރެއިން ކޮންމެ ނުވަ ދަރަވަރަކަށް ހުންނަނީ އެންމެ މުދައްރިސެއްކަން މީގެ ކުރީގެ ތަފާސް ހިސާބުތަކުން ދައްކާފައި ވާއިރު މީގެ ތެރެއިން އަތޮޅުތަކުގެ މަދަރުސާތަކުގައި ކޮންމެ ހަތް ދަރިވަރަކަށް ހުންނަނީ އެންމެ މުދައްރިސެކެވެ. އަދި މާލެއިން ކޮންމެ 12 ދަރިވަރަކަށް ހުންނާނީ އެއް މުދައްރިސެވެ. އެހެންކަމުން މިޕްރޮގްރާމާއެކު ދަރިވަރުންނަށް އިތުރު ސަމާލުކަން ދިނުމަށް އެކުދިންނަށް ބޭނުންވާ އެކަށީގެންވާ އަދަދަށް ކްލާސްރޫމްތަކަށް މުދައްރިސުން ހަމަވުމަކީ ޝައްކެއްވެސް އޮތްކަމެއްނޫނެވެ.

ބައިވެރިންނަށް މަހަކު 1,500 ރުފިޔާ ގެ އެލަވެންސެއް ލިބޭނެ މަގު ފަހުވެފަ އޮތުމަކީ މިޕްރޮގްރާމްގެ ބާރުވެރިކަން އިތުރުވެގެންދާނެ ކަމެކެވެ. ސަބަބަކީ ޕްރޮގްރާމްގައި ދެމިތިބުމަށް މުދައްރިސުންނަށް ހިތްވަރުލިބި މާލީ ހުރަސްތައް ކުޑަކުރުމަށް ދެވޭ ރަނގަޅު އެހީތެރިކަމަކަށް ވުމެވެ.

ވޭތުވެދިޔަ ދުވަސްތަކުގައި ދިރާސީ އަހަރު ނިމި ސްކޫލް ޗުއްޓީއަށްފަހު ސްކޫލްތައް ހުލުވޭއިރު މުދައްރިސުން ހަމަނުވުމަކީ އަބަދުވެސް ކުރިމަތިވާ މައްސަލައެކެވެ. އެތައް ބެލެނިވެރިންނެއްގެ ކަންބޮޑުވުން އެތައް ފަހަރަކު މިކަމާ ގުޅިގެން ވަނީ ފާޅުކޮށްފައެވެ.

މިއަހަރުގެ ޖެނުއަރީގެ ނިޔަލަށް ރާއްޖޭގައި 1،800 އެއްހާ ބިދޭސީ ޓީޗަރުން މަސައްކަތް ކުރަމުން ގެންދިޔައެވެ. ސަރުކާރުން އަހަރަކު 350 މިލިއަނެއްހާ ރުފިޔާ މިމުދައްރިސުންނަށް ހަރަދުކުރެއެވެ. އެހެންކަމުން ސަރުކާރުން ފަހިކޮށްދިން މިފުރުސަތުގައި އެކަށީގެންވާ ތަމްރީން ލިބިފައިވާ ދިވެހި މުދައްރިސުންތަކެއް ބިނާކުރެވި އިތުރު މުދައްރިސުން މިދާއިރާއަށް ވަނުމަށް ބާރުލިބިގެންދާކަމީ އަޅުގަނޑުމެންގެ ދަރިވަރުންގެ ކުރިއެރުމާއި ބެލެނިވެރިންގެ ކަންބޮޑުވުންތަކަށް އެޅޭ މުހިންމު ފިޔަވަޅެކެވެ.

މައިންބަފައިންގެ ތަރުބިއްޔަތާއި އެކު ދެން ދަރިވަރުންގެ ހަޔާތުގައި ބޮޑު ދައުރެއް އަދާކުރާ އެއްބަޔަކީ މުދައްރިސުން ކަމުގައި ވާއިރު ބޭރުން މުދައްރިސުން ރެކްރޫޓްކުރެވި ބޭރު ތަރުބިއްޔަތާއި ސަޤާފަތުގެ ތެރެއަށް ބިދޭސީ ޓީޗަރުންގެ އަތްމައްޗަށް ކުދިންގެ މުސްތަޤްބަލް އާރާސްތުކުރުމަށް ދޫކޮށްލުމުގެ ބަދަލުގައި މިފުރުސަތުން ފަހިވެގެން މިދަނީ ހުނަރުވެރި ދިވެހި މުދައްރިސުން އުފެއްދާ ދަރިންނަށް އުނގަންނައިދޭން ތިއްބަވާ މުދައްރިސުންނަކީ އިސްލާމްދީނުގެ ރިވެތި އުސޫލުތަކާއި ރާއްޖޭގެ ސަޤާފަތުގެ ހިޔާލިބިފައިވާ ބަޔަކަށް ވެގެންދާނެއެވެ.

ދިރާސާތަކުން ދައްކާގޮތުގައި ދަރިވަރުންގެ ސަގާފަތާއި ބަސް އެނގޭ މުދައްރިސުން ތިބުމުން ދަރިވަރުންނަށް މާބޮޑަށް ފައިދާކުރެއެވެ. އަދި މިއީ އެންމެން ހިމެނޭ އަދި ގުޅުންހުރި މާޙައުލެއް އުފެއްދުމަށް މަގުފަހިވާކޮށްދޭ ކަމެކެވެ.

ދިވެހިން މުދައްރިސުކަމަށް ތަމްރީނުކުރުމަށް އަމާޒުކޮށްގެން، ބޭރުގެ މުދައްރިސުންނަށް ބަރޯސާވުން މަދުކޮށް، ކްލާސްރޫމްތަކުގައި ސަގާފީ އަދި ބަހުގެ ގޮތުން އެކަށޭނަ މުދައްރިސުން ތިބުން ކަށަވަރުކޮށް، ރާއްޖޭގެ ތަޢުލީމީ ދާއިރާއަށް ދިގު މުއްދަތަކަށް ޚިދުމަތްކުރާނެ ބަޔަކު އުފެއްދުމަކީ އަޅުގަނޑުމެން ކޮންމެ ދިވެއްސަކަށްވެސް ލިބިގެންދާނެ ފަހުރެއްކަން ޔަގީނެވެ. 

ތ. މަޑިފުށީ ސްކޫލްގައި ޓީޗަރުންގެ ދަތިކަން އޮތްމިންވަރު ހާމަކޮށްދިނުމަށް މީގެކުރިން ކުރެވުނު މުޒާހަރާއެއްގެ ތެރެއިން ކަންބޮޑުވުން ފާޅުކުރަމުން ބެލެނިވެރިއަކު ބުނެފައިވަނީ މިކަމުގެ ސަބަބުން ދަރިވަރުންގެ ހައްޤު ގެއްލޭ ކަމަށެވެ. މާޅޮހު ސްކޫލްގެ މުދައްރިސުންގެ މައްސަލައަކީ މީގެކުރިން ކުރިމަތިވެ މައްސަލައެކެވެ.

ގިނަރަށްރަށުގެ ސްކޫލްތަކަކީ އުމްރާނީ ތަރައްގީގެ ގޮތުން ތަރައްގީވެފައިވާ ސްކޫލްތަކެއް ކަމުގައި ވީނަމަވެސް ކިޔަވައިދިނުމުގެ ގޮތުން ގިނަ ސްކޫލްތައް ދައްކަމުގައި ބެލެނިވެރިން ޝަކުވާކުރާލެއް މަދެއްނޫނެވެ.

މި ކަންބޮޑުވުންތަކަށް މާޒީގައި ދާއިމީ ހައްލެއް ގެނެސް ދެވިފައެއް ނުވެއެވެ.ނަމަވެސް މިހުރިހާ ޝަކުވާތަކާ ކަންބޮޑުވުންތަކަށް ރައީސް މުޢިއްޒު ގެނެސްދެއްވި ޙައްލާއިއެކު ދިވެހި މުދައްރިސުން މަދު މުހިންމު މާއްދާތަކަށް އަމާޒުކޮށްގެން މުދައްރިސުން ތައްޔާރުކުރެވޭނެ މަގު ފަހިވެގެންދާނެއެވެ.

މި ޕްރޮގްރާމްގެ އޮނިގަނޑުވަރަށްވެސް ފުރިހަމައެވެ. އޭ-ލެވެލް ކިޔެވުމާއެކު ފައުންޑޭޝަން ކޯސްތައް ހިމެނިފައިވާތީ، ޒުވާން ދިވެހިންނަށް މުދައްރިސުކަމަކީ ކުރިއެރުން ލިބޭނެ އަދި އިޙްތިރާމްކުރެވޭ ވަޒީފާއެއްގެ ގޮތުގައި ބެލެވޭނެއެވެ. އިތުރު މާލީ އެހީތެރިކަން ލިބުމަކީ އިޤްތިޞާދީ ގޮތުން ފުދުންތެރިކަން ކުޑަ ފަރާތްތަކަށްވެސް މި ދާއިރާއަށް އައުމަށް ފުރުޞަތު ލިބި، މުދައްރިސުކަމުގެ ދާއިރާގައި ތަފާތު ފަންތިތަކުގެ މީހުން ހިމެނުމަށް މަގުފަހިވާނެ ކަމެކެވެ.

ދިރާސީ އާ އަހަރު ފެށޭއިރު ރަށްރަށުގެ ސްކޫލުތަކަށް ޓީޗަރުން ހަމަނުވާ މައްސަލަ އަށް މީގެކުރިން މާބޮޑު އަހައްމިއްޔަތެއް ދެވިފައެއް ނުވެއެވެ. މިކަމަށް އޮތް ހައްލަކީ ކޮބައިތޯ ބުނެ އުފައްދާ ސުވާލަށް އެޑިޔުކޭޝަނުން އަބަދުވެސް އަންނަނީ އެފަދަ މައްސަލަތައް ހައްލުކުރުމަށްޓަކައި އިންތިޒާމެއްގެ ތެރެއިން މަސައްކަތްތަކެއް ކުރަމުން އަންނަކަމަށް ބުނަމުންނެވެ. ނަމަވެސް ދެމެހެއްޓެނިވި ބަދަލެއް ގެނެވިފައެއް ނެތެވެ.ވިސްނުންހުރީ އަބަދުވެސް މުދައްރިސަކަށް ފަހު މުދައްރިސެއް ރެކްރޫތް ކޯށްގެން ގެނެސް ކަންފަސޭހަ ކޮށްލާށެވެ.

އަޅުގަނޑުމެން އެންމެންގެ ވެސް އުންމީދަކީ ވަކި ރަށްތަކަކާއި މާއްދާތަކަކަށް އަމާޒުކޮށްގެން މި ޕްރޮގްރާމް ކުރިއަށްގެންދިއުމުން، ތަޢުލީމީ ވަސީލަތްތަކުގެ ގޮތުން ރަށްރަށުގެ މެދުގައި ހުރި ތަފާތުތައް ކުޑަކުރެވޭނެއެވެ. މިނިސްޓްރީގެ މަޤްޞަދަކީ ޕްރޮފެޝަނަލް ތަމްރީނު ލިބިފައިވާ އަދި އެ މުޖުތަމަޢުތަކަށް އަމިއްލަ ގޮތުން ޝައުޤުވެރިކަން ހުރި މުދައްރިސުން އެ ސަރަޙައްދުތަކަށް ފޮނުވުމެވެ. މިގޮތުން އެ ސަރަޙައްދުތަކުގައި މުދައްރިސުން ދެމިތިބުމުގެ ނިސްބަތް އިތުރުވެދާނެއެވެ.

ޝުކުރިއްޔާ ރައީސް މުޢިއްޒު ބުނަން ޖެހެނީ ސަބަބެއްނެތިއެއް ނޫނެވެ. މުދައްރިސުން ތަމްރީނުކުރުމުގެ ޕްރޮގްރާމާއި އެކު އަމިއްލައަށް ފުދުންތެރި ތަޢުލީމީ ދާއިރާއަކަށް ވާސިލުލުވެވޭނޭތީއެވެ. ދެމެހެއްޓެނިވި އެހީތެރިކަމާއި އެކު، ދިވެހިރާއްޖޭގެ ދަރިވަރުންނަށް ތަޢުލީމުގެ ފެންވަރާއި މިންވަރު ރަނގަޅުކުރެވިގެންދާތީއެވެ.ބޭރުގެ މުދައްރިސުން ގެނައުމަށާއި އެ މީހުންގެ ހުރުމާއި ދަތުރުފަތުރަށް ކުރަންޖެހޭ ޚަރަދަށް ބޮޑު ހަރަދުނުކޮށް ދިވެހި މުދައްރިސުން އެ މީހުންގެ މުޖުތަމަޢުތަކަށް އިޤްތިޞާދީ އަދި އިޖްތިމާޢީ ގޮތުން ޙިއްޞާކުރުމަށް މަގުފަހިކޮށްދެއްވީތީއެވެ.