ފަލަސްތީނުގެ މިނިވަން ދަޢުލަތެއް ޤާއިމުކުރެވުމުގެ ކުރިން، އިޒްރޭލާ އެކު ޚާރިޖީ ގުޅުން ޤާއިމުނުކުރާނެކަމަށް ސަޢުދީ އަރައްބިއްޔާއިން ބުނެފިއެވެ.

ސަޢުދީން މިހެން ބުނެފައިވަނީ، އެމެރިކާއަށް ގޮސް އުޅޭ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ސަޢުދީ އާ އެކު ޚާރިޖީ ގުޅުން ޤާއިމުކުރެވޭނެކަމުގެ އުއްމީދު ބޮޑުކަމަށް ބުނުމާ ގުޅިގެންނެވެ.

އެކަމާ ގުޅިގެން، ސަޢުދީގެ ޚާރިޖީ ވުޒާރާއިން އެކްސްގައި ބުނީ، އިރުމަތީ ޤުދުސްއަކީ ވެރިރަށް ކަމަށް ކަނޑައަޅައި، ފަލަސްތީނުގެ މިނިވަން ދައުލަތެއް ޤާއިމުކުރުމުގެ ކުރިން، އިޒްރޭލާ އެކު ޚާރިޖީ ގުޅުން ޤާއިމުނުކުރާނެ ކަމަށެވެ.

ސަޢުދީގެ އިތުރުން ދުނިޔޭގެ ގިނަ ޤައުމުތަކުން، ފަލަސްތީނުގެ މިނިވަން ދައުލަތެއް ޤާއިމުކުރަން ބާރު އަޅަމުންދާއިރު، އިޒްރޭލުން ވަނީ ތަކުރާރުކޮށް އެކަމާ ދެކޮޅު ހަދައިފައެވެ.

ސަޢުދީ އާއި އިޒްރޭލާ ދެމެދު ޚާރިޖީ ގުޅުން ޤާއިމުކުރަން އެމެރިކާއިން ދަނީ ކެނޑިނޭޅި މަސައްކަތް ކުރަމުންނެވެ.