ENGLISH

04 އޭޕްރީލު 2025

Advertisement

ޣައްޒާ ތަރައްޤީކުރަން ޓްރަމްޕްގެ ވިސްނުމަކީ ފަލަސްތީނު މީހުން ބާލައި، ތަނަށް ވެރިވެގަތުން

05 ފެބްރުއަރީ 2025

|

ހަސަން އާމިރު

ފަލަސްތީނުގެ ޣައްޒާ އަލުން ބިނާކޮށް، ތަރައްޤީ ކުރުމަށްޓަކައި، އެ ސިޓީގައި ދިރިއުޅޭ ރައްޔިތުން ބާލައި، އެތަން އަމިއްލަކުރުމުގެ ވިސްނުމެއް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވައިފިއެވެ.

އެމެރިކާއަށް ގޮސް އުޅޭ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާ ބައްދަލުކުރެއްވުމަށްފަހު، ޓްރަމްޕްގެ މި ޕްލޭން އިޢުލާނު ކުރެއްވުމުން، އެތަނުގައި ތިބި ނޫސްވެރިންނަށް ވެސް ކުއްލި ސިހުމެއް ލިބުނެވެ.

ޓްރަމްޕް އިޢުލާނުކުރެއްވި ގޮތުގައި، މިހާރު ސުންނާފަތިވެފައި އޮތް ޣައްޒާއަށް، ވިސްނުމަށް ގެންނަން ވެސް އުނދަގޫ މިންވަރަށް ތަރައްޤީ އާއި ކުރިއެރުން ގެންނަވާނެއެވެ.

ނަމަވެސް، އެ ޕްލޭން ތަންފީޒުކުރުމަށްޓަކައި، ޣައްޒާގައި ދިރިއުޅޭ ފަލަސްތީނުގެ ރައްޔިތުން އެތަނުން ބާލައި، އެތަނަކީ އެމެރިކާގެ އަމިއްލަ ތަނަކަށް ހެދުމުގެ ވިސްނުން ވެސް ޓްރަމްޕް ވަނީ އިޢުލާނުކުރައްވައިފައެވެ.

"އެމެރިކާއިން ޣައްޒާއާ ހަވާލުވެ، އަޅުގަނޑުމެން މަސައްކަތްތަކެއް ވެސް ކުރާނަން. އަޅުގަނޑުމެން އެތަން އަމިއްލަކުރާނަން،" ޓްރަމްޕް ވިދާޅުވިއެވެ.

ޓްރަމްޕްގެ އެ ޕްލޭނަށް ތާއީދުކޮށް، ނަތަންޔާހޫ ބުނީ، އެ ޕްލޭނަކީ ތާރީޚް ބަދަލުކޮށްލާނެ ހުށަހެޅުމެއް ކަމަށާއި، އެ ޕްލޭނު އަޑުއަހަންޖެހޭ ކަމަށެވެ.

ނަމަވެސް، އަމިއްލަ ވަޒަނުން ފަލަސްތީނު ރައްޔިތުން ބާލައި އެއްވެސް ހުށަހެޅުމަކަށް ތާއީދުނުކުރާނެ ކަމަށް ހަމާސް ޖަމާޢަތުން ވަނީ ބުނެފައެވެ.

އެމެރިކާގެ ރައީސްކަމަށް ދެވަނަ ދައުރަކަށް ވަޑައިގެން، ޓްރަމްޕް ގެންދަވަނީ ޣައްޒާއިން މީހުން ބާލައިގެން، މިޞްރާއި ޖޯޑަން އަށް ގެންދަން ތަކުރާރުކޮށް ބާރު އަޅުއްވަމުންނެވެ.

ނަމަވެސް، އެ ދެ ޤައުމުން ވެސް ވަނީ އެކަމަށް އެއްބާރުލުން ނުދޭނެ ކަމަށް ބުނެފައެވެ.

ކިޔުންތެރިންގެ ހިޔާލު