ސްރީ ލަންކާ އަކީ ކޮރަޕްޝަނަށް މަގުފަހިވެފައި އޮތް ޤައުމެއްގެ ގޮތުގައި މުޅި ދުނިޔެއަށް އާންމުވެފައި އޮތް ތަސައްވަރު ފުހެލަން އެ ޤައުމުގެ ރައީސް އަނުރަ ކުމާރު ޑިސަނަޔަކަ އަޒުމް ކަނޑައަޅުއްވައިފިއެވެ.

ސްރީ ލަންކާގެ މިނިވަން ދުވަސް ފާހަގަކުރަން ބޭއްވި ރަސްމިއްޔާތުގައި ވާހަކަ ދައްކަވަމުން ޑިސަނަޔަކަ ވިދާޅުވި ގޮތުގައި، ސްރީ ލަންކާ މިހާރު ވަނީ ކޮރަޕްޝަނާއި ފަސާދައަށް ފަހި މާހައުލެއް އޮތް ޤައުމެއްގެ ގޮތުގައި މުޅި ދުނިޔެއަށް މަޝްހޫރުވެފައެވެ.

މިނިވަން ދުވަހުގެ މުނާސަބަތުގައި ޤައުމަށް ދެއްވި މެސެޖެއްގައި ޑިސަނައިކަ ވިދާޅުވީ ސްރީ ލަންކާ އަކީ ކޮރަޕްޓް ސަރުކާރެއް އޮންނަ ޤައުމެއްގެ ގޮތުގައި ދުނިޔެއަށް އާންމުވެފައި އޮތް ތަސައްވުރު ބަދަލުކުރުމުގެ އަޒުމުގައި ހުންނެވި ކަމަށެވެ.

ކޯވިޑް-19ގެ ބަލިމަޑުކަމަށް ފަހު، 2022 ވަނަ އަހަރުގެ މެއި މަހުގެ ތެރޭގައި ބޭރުގެ ލޯނުތައް އަދާނުކުރެވޭ ވަރަށް ސްރީ ލަންކާގެ މާލީ ޙާލަތު ފުރަތަމަ ފަހަރަށް ގޯސްވީ ދަރަނި ގިނަވެ ދައުލަތުގެ ރިޒާވްގައި ހުރި ބޭރު ފައިސާގެ ޢަދަދު ދަށަށް ދިއުމުންނެވެ.

ނަމަވެސް، މިދިޔަ ސެޕްޓެމްބަރު މަހު ޑިސަނަޔަކަ ވެރިކަމަށް ވަޑައިގެން، ސްރީ ލަންކާއިން ދައްކަން ޖެހޭ 12.55 ބިލިއަން އެމެރިކާ ޑޮލަރުގެ ދަރަނި ދައްކާނެ ގޮތުގެ ރޭވުންތައް ވަނީ އަލުން އެކުލަވާލައްވައިފައެވެ.