އެމެރިކާ އާ ގުޅޭ ބޯޑަރު ބެލެހެއްޓުމުގައި ސިފައިންގެ އަދަދު އިތުރުކޮށް، ސަލާމަތީ ކަންކަން ވަރުގަދަ ކުރަން ކެނެޑާ އާއި މެކްސިކޯ އެއްބަސްވުމުން، އެ ޤައުމުން އެތެރެކުރާ މުދަލުން ޑިއުޓީ ބޮޑުކުރަން ނިންމި ނިންމުން، އެއް މަސް ދުވަހަށް ފަސްކޮށްފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާއާ އިންވެގެން އޮންނަ އެ ދެ ޤައުމަށް 25 ޕަސެންޓަށް ޑިޔުޓީ ބޮޑުކުރަން ޓްރަމްޕް ނިންމެވީ، މަސްތުވާތަކެތި އެތެރެކުރުމާއި ޤަވާޢިދާ ޚިލާފަށް މީހުން އެތެރެވުމުގެ ނުރައްކާ ބޮޑު ކަމަށް ވިދާޅުވެއެވެ.

ނަމަވެސް، އެ ދެ ޤައުމުގެ ވެރިންނާ އެކު އިއްޔެ "ވަރަށް ކާމިޔާބު" މަޝްވަރާތަކެއް ކުރެވުނު ކަމަށާއި، ބޯޑަރު ބެލެހެއްޓުން އިތުރަށް ވަރުގަދަ ކުރަން އެއްބަސްވުމުން، ޑިޔުޓީ ބޮޑުކުރުން އެއް މަސް ދުވަހަށް ފަސްކޮށްފައިވާ ކަމަށް ޓްރަމްޕް މިއަދު އިޢުލާނުކުރެއްވިއެވެ.

ކެނެޑާ އަދި މެކްސިކޯގެ އިތުރުން ޗައިނާގެ މުދަލުން ނަގާ ޑިޔުޓީގެ މައްޗަށް އިތުރު 10 އިންސައްތަ ބޮޑުކޮށްފައިވާކަން ޓްރަމްޕް ވަނީ އިޢުލާނު ކުރައްވައިފައެވެ.

އޭގެ ރައްދުގައި، ޗައިނާ އިން ވެސް ވަނީ އެމެރިކާއިން އެތެރެކުރާ މުދަލުގެ ބައެއް ބާވަތްތަކުން ޑިޔުޓީ ބޮޑުކުރަން ނިންމައި، އެކަން އިޢުލާނުކޮށްފައެވެ.

މިގޮތުން، ހަކަތަ އުފެއްދުމަށް ބޭނުންކުރާ ގިނަ ބާވަތްތަކުން 15 ޕަސެންޓު އަދި ދަނޑުވެރިކަމުގެ އާލަތްތަކުން 10 ޕަސެންޓު ބޮޑުކުރަން ޗައިނާއިން ވަނީ ނިންމައިފައެވެ.

އެމެރިކާއިން ހަކަތައިގެ ބާވަތްތަކުން، އަހަރަކު ހަތް ބިލިއަން ޑޮލަރުގެ މުދާ ޗައިނާއަށް އެތެރެކުރެއެވެ.