ދުނިޔޭގައި ކެންސަރުން މަރުވާ މީހުންގެ އަދަދު 2050 ވަނަ އަހަރާ ހަމައަށް ގާތްގަނޑަކަށް ދެގުނަ އިތުރުވާނެ ކަމަށް ދިރާސާއަކުން ދައްކައިފިއެވެ.

މިގޮތަށް މި އަދަދު އިތުރުވާނެ ކަމަށް ބެލެވެނީ މައިގަނޑު ގޮތެއްގައި ދަށް އަދި މެދު ފަންތީގެ އާމްދަނީ ލިބޭ ޤައުމުތަކުގައެވެ.

އޮސްޓްރޭލިއާގެ ކުއީންސްލޭންޑް ޔުނިވާސިޓީގެ ހަބްޓަމު ބިޒުއަޔެހު އާއި އޭނާގެ ޓީމުން ހޯދި ހޯދުންތަކުން ދައްކާ ގޮތުގައި، 2022 އާއި 2050 އާ ދެމެދު ދުނިޔޭގައި ކެންސަރު ޖެހޭ މީހުންގެ އަދަދު 77 އިންސައްތަ އިތުރުވާނެއެވެ. އަދި މި މުއްދަތުގައި ކެންސަރުން މަރުވާ މީހުންގެ އަދަދު 90 އިންސައްތަ އިތުރުވާނެ ކަމަށް ލަފާކުރެވެއެވެ.

މި ދިރާސާގައި ބަލާފައިވަނީ ގްލޯބަލް ކެންސަރ އޮބްޒަވޭޓަރީ ޑޭޓާބޭސްގެ މަޢުލޫމާތަށެވެ. މީގެ ތެރޭގައި 185 ޤައުމެއްގެ 36 ބާވަތެއްގެ ކެންސަރުން ތަފާސް ހިސާބު ހިމަނާފައިވެއެވެ. އަދި މުސްތަޤުބަލުގައި ކެންސަރު ޖެހޭ މީހުންނާއި މަރުވާ މީހުންގެ އަދަދު ލަފާކޮށްފައިވަނީ އދ. ގެ ތަރައްޤީގެ ޕްރޮގްރާމުން 2050 އަށް ލަފާކުރާ އާބާދީގެ އަދަދުތަކަށް ބަލައިގެންނެވެ.

އިންސާނީ ތަރައްޤީގެ އިންޑެކްސްގައި ދަށް ފަންފަތީގައި ހިމެނޭ ޤައުމުތަކުގައި، މިސާލަކަށް ނައިޖަރ އަދި އަފްޣާނިސްތާނުގައި، 2050 ވަނަ އަހަރާ ހަމައަށް ކެންސަރު ޖެހޭ މީހުންނާއި މަރުވާ މީހުންގެ އަދަދު ތިން ގުނަ އިތުރުވާނެ ކަމަށް ލަފާކުރެވެއެވެ. އެހެންނަމަވެސް، ނޯވޭ ފަދަ ތަރައްޤީވެފައިވާ ޤައުމުތަކުގައި މި އަދަދު އިތުރުވާނީ 42 އިންސައްތަ އާއި 56 އިންސައްތައާ ދެމެދުގެ މިންވަރަކަށެވެ.

މެސެޗުސެޓްސް ޖެނެރަލް ހޮސްޕިޓަލުގެ އެންޑްރޫ ޗަން ވިދާޅުވި ގޮތުގައި، މި ނަތީޖާތަކުން ހާމަވަނީ ކެންސަރު ޖެހޭ މީހުންގެ އަދަދު އިތުރުވަމުންދާކަމެވެ. މީގެ ސަބަބުތަކުގެ ތެރޭގައި މީހުންގެ އުމުރު ދިގުވުމާއި، ދިރިއުޅުމުގެ ވައްޓަފާޅި ބަދަލުވަމުން ދިއުން ހިމެނެއެވެ.

ޗަން އިތުރަށް ވިދާޅުވި ގޮތުގައި، ތަރައްޤީ ދަށް ޤައުމުތަކުގައި ކެންސަރުގެ ނިސްބަތް އެންމެ ބޮޑަށް އިތުރުވާނެ ކަމަށް ބެލެވެނީ "ހުޅަނގުގެ އާދަތައް" އެ ޤައުމުތަކުގައި އާންމުވަމުން ދާތީއެވެ. މީގެ ތެރޭގައި ބަރުދަން އިތުރުވުމާއި ގެއްލުންހުރި ކާނާ ކެއުން ފަދަ ކަންކަން ހިމެނެއެވެ.