އޮސްޓްރޭލިއާގައި 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް ޤާނޫނެއް ތަޢާރަފުކުރަން ނިންމާފައިވާ ކަމަށް އެ ގައުމުގެ ބޮޑުވަޒީރު އެންތޯނީ އަލްބަނީސް ވިދާޅުވެއްޖެ އެވެ.

މިއީ ދުނިޔޭގައި އަމަލުކުރަން ފަށާ މިފަދަ ފުރަތަމަ ޤާނޫނު ކަމަށް އޮސްޓްރޭލިއާ ސަރުކާރުން ބުނެއެވެ.

އޮސްޓްރޭލިއާގެ މުވާސަލާތީ ވަޒީރު މިޝެލް ރޯލެންޑް ވިދާޅުވި ގޮތުގައި މި ޤާނޫނުގެ ދަށުން މަނާކުރާ ސޯޝަލް މީޑިއާ ޕްލެޓްފޯމްތަކުގެ ތެރޭގައި މެޓާގެ އިންސްޓަގްރާމާއި ފޭސްބުކް، ބައިޓްޑާންސްގެ ޓިކްޓޮކް އަދި އެލޮން މަސްކްގެ އެކްސް (ކުރީގެ ޓްވިޓަރ) ހިމެނެއެވެ. މީގެ އިތުރުން އަލްފަބެޓްގެ ޔޫޓިއުބް ވެސް މި ޤާނޫނުގެ ދަށަށް ގެނެވޭނެ ކަމަށް ވަޒީރު ވިދާޅުވިއެވެ.

މި ޤާނޫނު މިއަހަރުގެ ތެރޭގައި ޕާލަމެންޓަށް ހުށަހަޅާނެ ކަމަށާއި، ޤާނޫނު ފާސްވުމަށް ފަހު 12 މަސް ދުވަހުގެ ތެރޭގައި ޢަމަލުކުރަން ފަށާނެ ކަމަށް ބޮޑުވަޒީރު ވިދާޅުވިއެވެ. އަދި މައިންބަފައިންގެ ހުއްދަ ލިބިގެން ވިޔަސް 16 އަހަރުން ދަށުގެ ކުދިންނަށް އިސްތިސްނާއެއް ނުދެވޭނެ ކަމަށް ވެސް އެމަނިކުފާނު ވިދާޅުވިއެވެ.

މި ޤާނޫނު ތަންފީޒުކުރުމުން ކުޑަކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ރަނގަޅު އަސަރުތަކެއް ކުރާނެ ކަމަށް އޮސްޓްރޭލިއާ ސަރުކާރުން އުންމީދުކުރެ އެވެ.