ރާއްޖޭގެ ތަޢުލީމީ ދާއިރާގައި ދިމާވެފައިވާ މުދައްރިސުންގެ ދަތިކަމަށް ޙައްލެއް ހޯދުމަށް ސަރުކާރުން ފަށާފައިވާ ޚާއްސަ ޕްރޮގްރާމްގެ ދަށުން، އަތޮޅުތަކުގެ 21 ރަށަކުން 130 އަށްވުރެ ގިނަ ދަރިވަރުން މުދައްރިސުންގެ ގޮތުގައި ތަމްރީނުވުމަށް ޝައުގުވެރިކަން ފާޅުކޮށްފައިވާ ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު މިއަދު ވިދާޅުވެއްޖެއެވެ.

މުދައްރިސުން ތަމްރީނުކުރުމުގެ ޤައުމީ ޕްރޮގްރާމް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ޔުނިސެފްގެ އެހީތެރިކަމާއެކު މިއަހަރުގެ މާރިޗު މަހު ފެށި މި މަސައްކަތަކީ ކާމިޔާބު މަސައްކަތެއް ކަމަށެވެ.

ރާއްޖޭގެ ތަޢުލީމީ ނިޒާމުގައި މި ވަގުތު ދިމާވެފައިވާ މުދައްރިސުންގެ ދަތިކަން ފާހަގަކުރައްވަމުން ވަޒީރު ވިދާޅުވީ، މިހާރު ވެސް ޕްރައިމަރީ ގްރޭޑްތަކަށް އެކަނިވެސް 250 ޓީޗަރުން އަވަސް ގޮތެއްގައި ބޭނުންވާ ކަމަށެވެ. އަދި މަތީ ގްރޭޑްތަކުގައި ވެސް ގިނަ މާއްދާތަކަށް ޓީޗަރުން މަދުވާ ކަމަށް ވަޒީރު ފާހަގަކުރެއްވި އެވެ.

މީގެއިތުރުން، އަމިއްލަ ރަށުގައި ތިބެގެން މަތީ ތަޢުލީމު ޙާޞިލުކުރުމުގެ ފުރުޞަތު ފަހިކޮށްދިނުމަށް ސަރުކާރުން މަސައްކަތްކުރަމުންދާ ކަމަށް ވަޒީރު ވިދާޅުވިއެވެ. މިގޮތުން މޯލްޑިވްސް ކޮލިފިކޭޝަން އޮތޯރިޓީ އާއި ވިލާ ކޮލެޖާ ގުޅިގެން ހިންގާ ޕްރޮގްރާމެއްގައި މި އަހަރު 140 އާ ގާތްކުރާ އަދަދެއްގެ ދަރިވަރުން ބައިވެރިވެފައިވާ ކަމަށާއި، އަންނަ އަހަރު މި އަދަދު 150 އަށް އިތުރުވާނެ ކަމަށް އުންމީދުކުރެވޭ ކަމަށް ވަޒީރު ވިދާޅުވިއެވެ.