މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން، ޓްރެވަލް ޓްރޭޑް ފަރާތްތަކާއި ޕްރޮފެޝަނުންގެ ބައިނަލްއަޤްވާމީ އެންމެ ބޮޑު އެއް ހަރަކާތްކަމަށްވާ 'އޯޓީއެމް 2025' ގައި ރާއްޖެ ޕްރޮމޯޓްކޮށް، އިންޑިއާގެ ޓޮޕް ސެލެބްރިޓީންނާއި އިންފުލުއެންސަރުންނާ އެކު 'މޯލްޑިވިއަން ނައިޓް' އެއް ބާއްވައިފިއެވެ.

އެމްއެމްޕީއާރުސީއިން ވަނީ ރާއްޖޭގެ ފަތުރުވެރިކަމުގެ ދާއިރާގެ 38 ޕާޓްނަރުންނާއެކު އޯޓީއެމް މުމްބާއީގައި ބައިވެރިވެ، އިންޑިއާގެ މާކެޓަށް ސަނީ ސައިޑް އޮފް ލައިފް ޕްރޮމޯޓްކޮށްފައެވެ. އޯޓީއެމް ފެއާ ކުރިއަށް ދިޔައީ ޖަނަވަރީ މަހުގެ 30 އިން ފެބްރުއަރީ 1 ވަނަ ދުވަހުގެ ނިޔަލަށް މުމްބާއީގެ ޖިއޯ ވޯލްޑް ކޮންވެންޝަން ސެންޓަރުގައެވެ.

އޯޓީއެމް 2025 ގައި އެމްއެމްޕީއާރުސީގެ އަމާޒަކީ އިންޑިއާގެ މާކެޓުގައި ދިވެހި ރާއްޖޭގެ ބްރޭންޑްތައް އިތުރަށް ހަރުދަނާކުރުމެވެ. އެ ބައްދަލުވުމުގައި، އިންޑިއާގެ ދަތުރުފަތުރުގެ ވިޔަފާރިއާ ގުޅިގެން ރާއްޖޭގެ އެންމެ ފަހުގެ ޓްރެވަލް އަޕްޑޭޓްތަކާއި، ރާއްޖޭގެ ޚާއްޞަ ފަތުރުވެރިކަމުގެ އުފެއްދުންތަކާއި، ޚިދުމަތްތަކާއި ތަޖުރިބާތައް ޙިއްޞާކުރުމަށް ފުރުޞަތު ލިބިގެން ދިޔައެވެ. އަދި، ހަރަކާތުގައި އެމްއެމްޕީއާރުސީ އިން ވަނީ، ރާއްޖެއަކީ އެންމެ އެދެވޭ ޝޯޓް ހޯލް މަންޒިލެއްގެ ގޮތުގައި ރާއްޖެ ދައްކާލާފައެވެ.

އިންޑިއާގެ 100 އަށް ވުރެ ގިނަ މަޝްހޫރު ސެލެބްރިޓީންނާއި އިންފުލުއެންސަރުން ބައިވެރިވި މޯލްޑިވިއަން ނައިޓް އޮތީ މިދިޔަ ހަފްތާ ބަންދުގައި ފޯ ސީޒަންސް ހޮޓެލް މުމްބާއީގައެވެ. މޯލްޑިވިއަން ނައިޓްގައި ބައިވެރި މަޝްހޫރު ތަރިންގެ ތެރޭގައި، ފަރާހް ޚާން، މޯނީ ރޯއީ، ފަރްދީން ޚާން، ވިހާން ސަމަތު، އަންގަދް ބެދީ، މަންދާނާ ކަރީމީ، ޝްރެޔާ ފިލްގާއޮންކަރު، ޝަޝާންކް ސަންގާވީ، ރިޗީ ޝާހް، ރުޗީ ސޯނީ، ޝިފާ މަރޗަންޓް، ރާހުލް ޖަގްތިއާނީ، ތޯމަސް ޕަސްކަލް، މޮނިޝާ، ބްރިންދާ ޝާހް، ސްޓެފަނީ ޓިމިންސް، ޕަރޭޝް، އަދި ސަލްމާން މަރޗަންޓް ހިމެނެއެވެ.

އެމްއެމްޕީއާރުސީ އިން ވިދާޅުވީ މޯލްޑިވިއަން ނައިޓްގައި ބައިވެރިވި މަޝްހޫރު ތަރިންގެ ސޯޝަލް މީޑިއާ ފޮލޯވަރުންގެ އަދަދު 200 މިލިއަނަށްވުރެ ގިނަ ކަމަށެވެ. މޯލްޑިވިއަން ނައިޓްގެ ސަބަބުން އިންޑިއާގައި ރާއްޖެ ޕްރޮމޯޓްކުރުމަށް ވަރަށް ބާރުގަދަ ޕްލެޓްފޯމެއް ލިބިގެންދިޔަ ކަމަށާއި، ފުޅާ ދާއިރާއެއްގައި ކުރިއަށްގެންދާ ޕްރޮމޯޝަނަލް ކެމްޕޭންގެ ބައެއްގެ ގޮތުގައި، އިންފުލުއެންސަރުންގެ ތެރެއިން ގިނަ ބަޔަކު ކުރިއަށް އޮތް މަސްތަކުގައި ރާއްޖެ ޒިޔާރަތްކުރުމަށް ހަމަޖެހިފައިވާކަމަށް އެމްއެމްޕީއާރުސީ އިން ވިދާޅުވިއެވެ.  

ރާއްޖެ ޕްރޮމޯޓްކުރުމަށް އިންޑިއާގައި ކުރިއަށްގެންދިޔަ ހަރަކާތްތަކުގައި އެމްއެމްޕީއާރުސީގެ މެނޭޖިންގ ޑިރެކްޓަރު އިބްރާހީމް ޝިއުރީ ބައިވެރިވެޑައިގެންނެވިއެވެ.

މިދިޔަ އަހަރު އިންޑިއާއިން ވަނީ ރާއްޖެއަށް 130،805 ފަތުރުވެރިން އައިސްފައެވެ. އެއީ މުޅި އަހަރު ރާއްޖެ ޒިޔާރަތްކުރި ފަތުރުވެރިންގެ 6.4 އިންސައްތަ މާކެޓް ހިއްސާއެވެ. އެމްއެމްޕީއާރުސީގެ މިއަހަރުގެ އަމާޒަކީ އިންޑިއާއިން ރާއްޖެ ޒިޔާރަތްކުރާ ފަތުރުވެރިންގެ އަދަދު ތިންލައްކައަށް އިތުރުކުރުމެވެ.

އިންޑިއާގެ މާކެޓްގައި ރާއްޖޭގެ ފަތުރުވެރިކަން ޕްރޮމޯޓްކުރުމުގެ ގޮތުން އެމްއެމްޕީއާރުސީއިން އަންނަނީ ތަފާތު ގިނަ މާކެޓިން ހަރަކާތްތައް ހިންގަމުންނެވެ.