ފާއިތުވި އަހަރުގެ ދެވަނަ ކުއާޓާގައި ފާއިތުވި އަހަރުތަކުގައި އެންމެ ބޮޑު ގެއްލުމުގައި ހިންގަމުން އައި ދައުލަތުގެ ކުންފުނިތަކުގެ ތެރޭގައި ހިމެނޭ ފެނަކަ ކޯޕަރޭޝަނާއި ދައުލަތުގެ މީޑިޔާ ކުންފުނި ޕަބްލިކް ސާވިސް މީޑިޔާއަށް ފައިދާވެފައިވާކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ގެ މާލީ ހިސާބުތަކުން ދައްކައިފިއެވެ. 

ޕީސީބީން އާންމުކޮށްފައިވާ ހިސާބުތަކަށް ބަލާއިރު 2023 ވަނަ އަހަރުގެ ތިންވަނަ ކުއާޓާއާއި ހަތަރުވަނަ ކުއާޓާގައިވެސް ގެއްލުންވި ފެނަކައަށް 2024 ވަނަ އަހަރުގެ ފުރަތަމަ ދެ ކުއާޓާގައި ފައިދާވެފައިވެއެވެ. ފެނަކައަކީ ފާއިތުވި ސަރުކާރުގައި އެ ކުންފުނީގެ ހިންގުމުގައި ބޮޑެތި އިހުމާލުތަކެއްވެ، ކޮރަޕްޝަނާއި ފަސާދައަށް މަގުފަހިވާ ގޮތަށް ޢަމަލުކުރުމުގެ ސަބަބުން ވަރަށް ބޮޑަށް ގެއްލުންވެ ދަރަނިވެރިވެފައި އޮތް ކުންފުންޏެކެވެ. 

އެގޮތުން 2023 ވަނަ އަހަރު ނިމުނުއިރު ފެނަކައިގެ ދަރަނި ހަތަރު ބިލިއަނާ ގާތްކުރާކަން އެއިރު ޕީސީބީން ޢާންމުކުރި މާލީ ހިސާބުތަކުން ދައްކައެވެ. ނަމަވެސް މި ސަރުކާރު ވެރިކަމާ ޙަވާލުވެ ފެނަކައިގެ ހިންގުން ހަރުދަނާކުރުމަށް އެޅި ފިޔަވަޅުތަކުގެ ސަބަބުން ފެނަކައިގެ މާލީ ޙާލަތު ރަނގަޅުވާން ފަށާފައިވާކަން ޕީސީބީގެ އެންމެ ފަހު ރިޕޯޓުން ދައްކައެވެ. 

ޕީސީބީން ޢާންމުކުރި ހިސާބުތަކަށް ބަލާއިރު ފެނަކައަށް ނިމުނު އަހަރުގެ ފުރަތަމަ ދެ ކުއާޓާގައި 1.3 ބިލިއަން ރުފިޔާގެ އާމްދަނީއެއް ލިބުނެވެ. އެ އާމްދަނީގެ ތެރެއިން އެ ކުންފުންޏަށް ސާފު ފައިދާގެ ގޮތުގައި ފުރަތަމަ ކުއާޓާގައި ލިބުނު ހަތަރު މިލިއަން ރުފިޔާއާއި ދެވަނަ ކުއާޓާގައި އާމްދަނީގެ ގޮތުގައި ލިބުނު ހަތް މިލިއަން ރުފިޔާއާއެކު ޖުމްލަ 11 މިލިއަން ރުފިޔާގެ ފައިދާއެއް ލިބިފައިވެއެވެ. 

ނިމުނު އަހަަރުގެ ދެވަނަ ކުއާޓާގައި ފެނަކައަށް ލިބުނު އާމްދަނީގެ ތެރެއިން 237 މިލިއަން ރުފިޔާ އެ ކުންފުނީގެ މުވައްޒަފުންނަށް ހަރަދުކޮށްފައިވެއެވެ. އެއީ އެ  ކުންފުންޏަށް ލިބުނު އާމްދަނީ %36 އެވެ. 

ފެނަކައިގެ އިތުރަށް ޒަމާނުއްސުރެ ގެއްލުމުގައި ހިންގަމުން އައި ޕަބްލިކް ސާވިސް މީޑިޔާ (ޕީއެސްއެމް)އަށް ފާއިތުވި އަހަރުގެ ދެވަނަ ކުއާޓާގައި ފައިދާވެފައިވާކަން ޕީސީބީގެ މާލީ ހިސާބުތަކުން ދައްކައެވެ. އެކުންފުންޏަށް ނިމުނު އަހަރުގެ ދެވަނަ ކުއާޓާގައި 65 މިލިއަން ރުފިޔާގެ އާމްދަނީއެއް ލިބުނުއިރު މިއީ ފާއިތުވި ފަސް ކުއާޓާގައި އެ ކުންފުންޏަށް ލިބުނު އާމްދަނީއަށްވުރެ އިތުރު އަދަދެކެވެ. 

އެ ކުންފުނީގެ މާލީ ހިސާބުތަކަށް ބަލާއިރު 2023 ވަނަ އަހަރުގެ ހުރިހާ ކުއާޓާއެއްގައި އެ ކުންފުނި ހިންގާފައިވަނީ ގެއްލުމުގައެވެ. ނަމަވެސް ފާއިތުވި އަހަރުގެ ދެވަނަ ކުއާޓާގައި އެ ކުންފުންޏަށް ސާފު ފައިދާގެ ގޮތުގައި 27 މިލިއަން ރުފިޔާ ލިބިފައިވެއެވެ. 

ދައުލަތުގެ ކުންފުނިތަކުގެ ހިންގުން ހަރުދަނާކުރައްވައި އެ ކުންފުނިތަކުގެ އިސްރާފު ކުޑަކުރައްވައި ބޮޑު ގެއްލުމުގައި ހިންގަވަމުން އައި ކުންފުނިތައް ފައިދާ ލިބޭ ކުންފުނިތަކަކަށް ހެއްދެވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވަޢުދުފުޅެކެވެ. އެ ވަޢުދުފުޅު ތަންފީޒުކުރެއްވުމުގެ ގޮތުގައި ސަރުކާރުން ގެންދަވަނީ ކުންފުނިތައް ހިންގުމުގެ އުސޫލުތައް ހަރުދަނާކުރައްވައި، ކުންފުނިތައް ޖަވާބުދާރީކުރެއްވުމުގެ ނިޒާމު އިތުރަށް ވަރުގަދަކުރެއްވުމަށް ތަފާތު ފިޔަވަޅުތައް އަޅުއްވަމުންނެވެ.