އެމެރިކާއިން ކެނެޑާ އަދި މެކްސިކޯއިން އެތެރެކުރާ މުދަލުން 25 އިންސަތައިން ޑިޔުޓީ ބޮޑުކުރަން ނިންމެވުމަށްފަހު، އެ ދެ ޤައުމާ އެކު މަޝްވަރާ ކުރައްވާނެ ކަން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާ އާ އިންވެގެން އޮންނަ އެ ދެ ޤައުމަށް މަސްތުވާތަކެތި އެތެރެކުރުމާއި ޤަވާޢިދާ ޚިލާފަށް މީހުން އެތެރެވުމުގެ ނުރައްކާ ބޮޑު ކަމަށް ޓްރަމްޕް ވިދާޅުވިއެވެ.

ނަމަވެސް، މި ހަފްތާ ބަންދުގައި ފްލޮރިޑާއަށް ކުރެއްވި ދަތުރުފުޅަށްފަހު އެނބުރި ވޮޝިންގޓަންއަށް ވަޑައިގެން ޓްރަމްޕް ވިދާޅުވީ، ޑިޔުޓީ ބޮޑުކުރުމާ ގުޅޭގޮތުން މާދަމާގެ ވަގުތެއްގައި ކެނެޑާގެ ބޮޑުވަޒީރު ޖަސްޓިން ޓްރޫޑޯ އާއި މެކްސިކޯ އާ އެކު ވެސް ފޯނުން ގުޅުއްވައި މަޝްވަރާކުރައްވާނެ ކަމަށެވެ.

"އެކަމަކު މި މަޝްވަރާތަކުން މާ ބޮޑު ބަދަލެއް އަންނާނެ ކަމަކަށް ނުބެލެވޭ،" ޓްރަމްޕް ވިދާޅުވިއެވެ.

އެމެރިކާއިން ޑިޔުޓީ ބޮޑުކުރުމުގެ ރައްދުގައި ކެނެޑާއިން ވެސް ވަނީ އެމެރިކާގެ މުދަލުން 25 އިންސަތައިން ޑިޔުޓީ ބޮޑުކުރަން ނިންމައިފައެވެ. ކެނެޑާގެ ފަހަތުން މެކްސިކޯ ވެސް ވަނީ އެމެރިކާގެ މުދަލުން ޑިޔުޓީ ބޮޑުކުރާނެކަމުގެ އިންޒާރުދީފައެވެ.

ޓްރަމްޕްގެ މި ނިންމެވުމުގެ ސަބަބުން، ތަކެތީގެ އަގު އުފުލޭނެ ކަމަށް އިޤްތިޞާދީ މާހިރުން ދަނީ ބުނަމުންނެވެ.

ނަމަވެސް، ޓްރަމްޕް ގެންދަވަނީ އެ ވާހަކަތަކާ ދެކޮޅު ހައްދަވަމުންނެވެ. ޓްރަމްޕް ވިދާޅުވާ ގޮތުގައި، މި ނިންމުމުގެ ކުރީކޮޅު އުނދަގޫތަކެއް ކުރިމަތިވިޔަސް، މިކަމުގެ ފައިދާ އެމެރިކާއަށް ކުރާނެ އެވެ.

ކެނެޑާ އަދި މެކްސިކޯގެ އިތުރުން ޗައިނާގެ މުދަލުން ނަގާ ޑިޔުޓީގެ މައްޗަށް އިތުރު 10 އިންސައްތަ ބޮޑުކޮށްފައިވާކަން ޓްރަމްޕް ވަނީ އިޢުލާނުކުރައްވައިފައެވެ.

އެމެރިކާގެ ވިޔަފާރީގެ ސިޔާސަތަށް ގެންނަވާ ބަދަލުތަކުގެ ތެރެއިން، އެހެން ޤައުމުތަކާ ދެކޮޅަށް ވެސް މިފަދަ ބައެއް ފިޔަވަޅުތައް އަޅުއްވާނެ ކަމުގެ އިންޒާރު ޓްރަމްޕް ވަނީ ދެއްވައިފައެވެ.

އެމެރިކާގެ ވިޔަފާރި އާއި ޤައުމީ މަސްލަޙަތު ހިމާޔަތްކުރަން، ޑިޔުޓީ ބޮޑުކުރުމަކީ އެންމެ ވަރުގަދަ ހަތިޔާރުގެ ގޮތުގައި ޓްރަމްޕް ވަނީ ތަކުރާރުކޮށް ސިފަކުރައްވައިފައެެވެ.

އޭގެތެރޭގައި ޔޫރަޕިއަން ޔޫނިއަން (އީޔޫ)ގެ ޤައުމުތަކާއި އިންޑިއާ ވެސް ހިމެނޭކަމުގެ އިޝާރާތެއް ޓްރަމްޕް ވަނީ ދެއްވައިފައެވެ.