މަސްތުވާތަކެތި އެތެރެކުރުމާއި ޤަވާޢިދާ ޚިލާފަށް މީހުން އެތެރެވުމުގެ ނުރައްކާ ބޮޑު ކަމަށް ވިދާޅުވެ، އެމެރިކާއިން ކެނެޑާ، މެކްސިކޯ އަދި ޗައިނާއިން އެތެރެކުރާ މުދަލުން ނަގާ ޑިޔުޓީ ރައީސް ޑޮނަލްޑް ޓްރަމްޕް ބޮޑުކުރައްވައިފިއެވެ.

ކެނެޑާ އަދި މެކްސިކޯ އިން އެމެރިކާ އަށް އެތެރެކުރާ މުދަލުން ނަގާ ޑިޔުޓީ 25 އިންސައްތަ ވަނީ ބޮޑުކޮށްފައެވެ. އަދި ޗައިނާގެ މުދަލުން ނަގާ ޑިޔުޓީގެ މައްޗަށް އިތުރު 10 އިންސައްތަ ބޮޑުކޮށްފައިވާކަން ޓްރަމްޕް މިއަދު ވަނީ އިޢުލާނުކުރައްވައިފައެވެ.

މެކްސިކޯގެ ރައީސް ކްލޯޑިއާ ޝައިންބައުމް ވަނީ ޓްރަމްޕްގެ ތުހުމަތުތައް ދޮގުކުރައްވައި، މި ފިޔަވަޅުގެ ރައްދުގައި އެމެރިކާގެ މުދަލުން ނަގާ ޑިޔުޓީ ބޮޑުކުރައްވާނެކަމުގެ އިންޒާރު ދެއްވައިފައެވެ.

ކެނެޑާގެ ބޮޑުވަޒީރު ޖަސްޓިން ޓްރޫޑޯ ވެސް ވަނީ، އެމެރިކާއިން ޑިޔުޓީ ބޮޑުކުރި އަދަދުން ކެނެޑާއަށް އެތެރެކުރާ އެމެރިކާގެ މުދަލުން ޑިޔުޓީ ބޮޑުކުރައްވާނެ ކަމަށް ވިދާޅުވެފައެވެ. މިގޮތުން ފުރަތަމަ ބުރުގައި ކެނެޑާއަށް އެތެރެކުރާ ގާތްގަނޑަކަށް 106 ބިލިއަން އެމެރިކާ ޑޮލަރުގެ މުއްދަލުން ޑިޔުޓީ ބޮޑުކުރަން ޓްރޫޑޯ ވަނީ ނިންމަވައިފައެވެ.

ޓްރަމްޕްގެ މި ނިންމެވުމުގެ ސަބަބުން، ތަކެތީގެ އަގު އުފުލޭނެ ކަމަށް އިޤްތިޞާދީ މާހިރުން ދަނީ ބުނަމުންނެވެ.

އެމެރިކާގެ ވިޔަފާރީގެ ސިޔާސަތަށް ގެންނަވާ ބަދަލުތަކުގެ ތެރެއިން، އެހެން ޤައުމުތަކާ ދެކޮޅަށް ވެސް މިފަދަ ބައެއް ފިޔަވަޅުތައް އަޅުއްވާނެ ކަމުގެ އިންޒާރު ޓްރަމްޕް ވަނީ ދެއްވައިފައެވެ.

އެމެރިކާގެ ވިޔަފާރި އާއި ޤައުމީ މަސްލަޙަތު ހިމާޔަތްކުރަން، ޑިޔުޓީ ބޮޑުކުރުމަކީ އެންމެ ވަރުގަދަ ހަތިޔާރުގެ ގޮތުގައި ޓްރަމްޕް ވަނީ ތަކުރާރުކޮށް ސިފަކުރައްވައިފައެެވެ.

އޭގެތެރޭގައި ޔޫރަޕިއަން ޔޫނިއަން (އީޔޫ)ގެ ޤައުމުތަކާއި އިންޑިއާ ވެސް ހިމެނޭކަމުގެ އިޝާރާތެއް ޓްރަމްޕް ދެއްވާފައިވެއެވެ.