ޣައްޒާގައި ދިރިއުޅޭ ފަލަސްތީނުގެ ރައްޔިތުންގެ "ސަލާމަތަށްޓަކައި" އެ މީހުން ޖޯޑަން އާއި މިޞްރަށް ގެންގޮސް، އެ މީހުންގެ އަމިއްލަ ވަޒަނުން ބާލަން ބޭނުންވާ ނުވާކަމަށް، އެ ދެ ޤައުމުގެ ވެރިން ވެސް ވިދާޅުވެފައިވަނިކޮށް، އެ ވިސްނުން ދޫކޮށްލެއްވުމުގެ ވިސްނުމެއް ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެ ޚިޔާލު ޓްރަމްޕް އެންމެ ފުރަތަމަ ހުށަހެޅުއްވީ މިދިޔަ ހޮނިހިރު ދުވަހުއެވެ. ޓްރަމްޕް ވިދާޅުވީ، ހަނގުރާމައިގެ ސަބަބުން، މުޅި ޣައްޒާ ސުންނާފަތިވެފައިވާއިރު، އެ ބިރުވެރިކަމާއި ނިކަމެތިކަމުގައި ފަލަސްތީނުގެ އާންމުން ދިރިއުޅެން ޖެހުމަކީ ހިތާމަކުރައްވާ ކަމެއް ކަމަށެވެ.

އެހެންކަމުން، ޣައްޒާގައި ދިރިއުޅޭ ދެ މިލިއަނެއްހާ މީހުން "ވަރަށް ފަސޭހައިން" ޖޯޑަން އަދި މިޞްރަށް ގެންދެވޭނެ ކަމަށް ޓްރަމްޕް ވިދާޅުވިއެވެ.

ނަމަވެސް، ޖޯޑަން އާއި މިޞްރުގެ ވެރިން ވެސް ވަނީ ޓްރަމްޕްގެ އެ ޚިޔާލަށް އެއްބަސްވެވެން ނެތް ކަމަށް ވިދާޅުވެފައެވެ.

މިޞްރުގެ ރައީސް ޢަބްދުލްފައްތާޙް އަލް ސީސީ ވިދާޅުވީ، ޣައްޒާގެ ރައްޔިތުންގެ އަމިއްލަ ބިމުން ބާލައި، އެހެން ތަނަކަށް ބަދަލުކުރުމަކީ ބޭއިންސާފެއް ކަމަށާއި، އެފަދަ ބޭއިންސާފެއްގައި މިޞްރު ބައިވެރިނުވާނެ ކަމަށެވެ.

ޖޯޑަންގެ ރަސްގެފާނު ޢަބްދުﷲ ދެވަނަ ވިދާޅުވީ، ފަލަސްތީނުގެ ރައްޔިތުން އެ މީހުން އަމިއްލަ ބިމުގައި ދެމިތިބުމުގައި ޖޯޑަންއިން ގެންގުޅޭ ސިޔާސަތު ބަދަލު ނުކުރައްވާނެ ކަމަށެވެ.

ނަމަވެސް، އެ ޚިޔާލު ދޫކޮށްލެއްވުމުގެ ވިސްނުމެއް ޓްރަމްޕް ނުގެންގުޅުއްވައެވެ.

"އެ މީހުން [ޖޯޑަން އަދި މިޞްރު] އެކަން ކުރާނެ. އަޅުގަނޑުމެން [އެމެރިކާ] އެ މީހުންނަށް ބައިވަރު ކަންތައްތައް ކޮށްދެން،" ޓްރަމްޕް ވިދާޅުވިއެވެ.