ލިމިޓް ހަމަވުމުންނޫނީ އާސަންދަ ނުދޭން ނިންމުމާ އެކު ކޭޝްލެސް ހިދުމަތް ހުއްޓާލި ތިން ތަނަކުން އަލުން ހިދުމަތްދޭން ފަށައިފިއެވެ.

އާސަންދަ ރިފޯމްކުރަން ފަށައި، އެ ސްކީމަށް ގެނައި ބަދަލުގެ ދަށުން ޕްރައިވެޓް އިންޝުއަރެންސެއް އޮތް ނަމަ، އޭގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ސިއްހީ ހިދުމަތްދޭ ތަންތަނަށް އަންގައި އެގޮތަށް އަމަލުކުރަން ފެށީ މިދިޔަ ހުކުރު ދުވަހުން ފެށިގެންނެވެ.

އެ ނިންމުމާ ގުޅިގެން، ޖެހިގެން އައި ދުވަހު ބައެއް ތަންތަނުން ވަނީ ކޭޝްލެސް ހިދުމަތް ދިނުން ހުއްޓާލައި ފައެވެ. އެކަމާ ގުޅިގެން، ހިދުމަތް ހޯދާ މީހުން އަމިއްލަ އަތުން ފައިސާ ދައްކަން ޖެހުމުން ޝަކުވާ ވަރަށް ބޮޑުވުމުން ސަރުކާރުގެ އިންޝުއަރެންސް ކުންފުނި، އެލައިޑުން ވަނީ ކޭޝްލެސް ހިދުމަތް އަލުން ފަށައިފަ އެވެ.

އޭގެ އިތުރުން ހިދުމަތް މެދުކަނޑާލި، އަމާނާ ތަކާފުލް އާއި ސޮލަރެލް އިން ވެސް މިހާރު ވަނީ އަލުން ކޭޝްލެސް ހިދުމަތް ފަށައިފަ އެވެ.

ކޭޝްލެސް ހިދުމަތް މެދުކަނޑާލުމުން އެ ފައިސާ އަނބުރާ ލިބޭނީ، ފަރުވާ ހޯދަން ހޭދަކުރި ބިލު، އެ މީހަކު އަމިއްލައަށް އިންޝުއަރެންސް ކުންފުންޏަށް ހުށަހެޅުމުންނެވެ.

އެންސްޕާ އިން ނެރުނު ބަޔާނެއްގައި ބުނީ ސިއްހީ ހިދުމަތްތަކަށް އަމިއްލަ އަށް ފައިސާ ދައްކަން ޖެހޭ ކޮންމެ ހާލަތެއްގައި އާސަންދަ ލިބޭނެ ކަމަށެވެ.