އެމެރިކާގެ ވެރިރަށް ވޮޝިންގްޓަންގެ އެއާޕޯޓަކަށް ޖައްސަން އުޅުމުގެ ތެރޭގައި އާންމުން ދަތުރުކުރަމުންދިޔަ މަތިންދާބޯޓަކާއި އަސްކަރީ ހެލިކޮޕްޓަރެއް ވައިގެ ތެރޭގައި ޖެހި، ހިނގި ނުރައްކާތެރި އެކްސިޑެންޓެއްގައި އެތައް ބަޔަކު މަރުވެއްޖެއެވެ.

މި ހާދިސާ ހިނގާފައިވަނީ، ރޭގަން ވޮޝިންގްޓަން ނެޝަނަލް އެއާޕޯޓަށް ޖައްސަން އައި އެމެރިކަން އެއާލައިންސްގެ ފްލައިޓެއް، އެމެރިކާގެ އަސްކަރިއްޔާގެ ބްލެކް ހޯކްސް ހެލިކޮޕްޓަރެއްގައި ޖެހިގެންނެވެ.

އެމެރިކަން އެއާލައިންސްއިން ބުނީ، ހާދިސާ ހިނގި ވަގުތު މަތިންދާބޯޓުގައި 60 ފަސަންޖަރުންނާއި ހަތަރު ކްރޫއިން ދަތުރުކުރަމުންދިޔަ ކަމަށެވެ. އެމެރިކާގެ އަސްކަރިއްޔާއިން ބުނީ، އެ ބޯޓުގައި ޖެހުނު ހެލިކޮޕްޓަރުގައި ސިފައިންގެ ތިން މީހުން ތިބި ކަމަށެވެ.

ވައިގެ ތެރޭގައި ހިނގި އެކްސިޑެންޓުގައި، އެ އުޅަނދުތައް އެއާޕޯޓު ކައިރީގައި އޮންނަ ޕޮޓޯމެކް ކޯރަށް ވަނީ ވެއްޓިފައެވެ. ބައެއް މީޑިޔާ ރިޕޯޓުތައް ބުނާ ގޮތުން، މިހާތަނަށް 18 މީހުންގެ ހަށިގަނޑު އެ ކޯރުން ވަނީ ނަގައިފައެވެ. އަދި އިތުރު މީހުން ހޯދުމުގެ މަސައްކަތް ކަމާގުޅޭ އިދާރާތަކުން ދަނީ ކުރަމުންނެވެ.

އެމެރިކަން އެއާލައިންސްގެ ފްލައިޓް 5342 ރޭގަން އެއާޕޯޓަށް ދަތުރުކުރަމުން ދިޔައީ ވިޗިޓާ، ކެންސަސްއިން ފުރައިގެންނެވެ. ހެލިކޮޕްޓަރު ދަތުރުކުރަމުންދިޔައީ، ވަރޖީނިޔާގައި ހުންނަ އަސްކަރީ މަރުކަޒުން ނައްޓާލައިގެން ކަމަށް އެމެރިކާގެ އަސްކަރިއްޔާއިން ބުންޏެވެ.

މިއީ 2009 ވަނަ އަހަރުގެ ފަހުން، އެމެރިކާގައި ހިނގި އެންމެ ނުރައްކާތެރި ވައިގެ ހާދިސާއެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމުގެ ތަހުޤީޤު ފަށާފައިވާއިރު، މި ތަހުޤީޤަށް ފުރިހަމަ އެއްބާރުލުން ދޭނެ ކަމަށް އެމެރިކަން އެއާލައިންސްއިން ވަނީ ބުނެފައެވެ.