ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުމަށް ޢަމަލުކުރަން ފެށި ފަހުން، އިޒްރޭލު ސިފައިން ހުޅަނގު އައްސޭރިއަށް ދޭ ޙަމަލާތައް ވަރުގަދަކޮށްފައިވާއިރު، އިއްޔެ ދިން ވައިގެ ޙަމަލާތަކެއްގައި 10 މީހަކު ޝަހީދުވެފައިވާ ކަމަށް ފަލަސްތީނުގެ ހެލްތު މިނިސްޓްރީން ބުނެފިއެވެ.

އާންމު އުޞޫލުގެ ދަށުން، އިޒްރޭލުގެ އަސްކަރިއްޔާއިން ބުނީ އެ ޙަމަލާތައް އަމާޒުކޮށްފައިވަނީ، ޓެރަރިސްޓުން ތިބި ތަނަކަށް ކަމަށެވެ.

ނަމަވެސް، އެ ޙަމަލާގައި ޝަހީދުވެފައިވަނީ އާންމުން ކަމަށް ރެޑް ކްރެސެންޓުން ވެސް ވަނީ ބުނެފައެވެ.

މި ޙަމަލާ ދިނުމަށް ޑްރޯން ބޭނުންކޮށްފައިވާ ކަމަށް ތުހުމަތުކުރެވޭއިރު، ޙަމާސް ޖަމާޢަތުން ވަނީ މި ޙަމަލާ ކުށްވެރިކޮށްފައެވެ.

ޙަމާސް އާއި އިޒްރޭލާ ދެމެދު 2023 ގެ އޮކްޓޯބަރުގައި ހަނގުރާމަ ފެށުނު ފަހުން، ޣައްޒާގެ އިތުރުން ހުޅަނގު އައްސޭރީގައި ވެސް ޔަހޫދީ ސިފައިންގެ އަނިޔާވެރިކަން ވަނީ އިތުރުވެފައެވެ.

މިގޮތުން، މި މުއްދަތުގެ ތެރޭގައި، އިޒްރޭލުގެ ޙަމަލާތަކުގައި ހުޅަނގު އައްސޭރީގައި ޝަހީދުކޮށްލާފައިވާ މީހުންގެ އަދަދު 870 އަށް ވުރެ ގިނަ ކަމަށް ފަލަސްތީނުން ބުނެފައިވެއެވެ.