ENGLISH
04 އޭޕްރީލު 2025
އެމެރިކާއަށް ވަގަށް އެތެރެވެފައިވާ 30،000 މީހުން ހައްޔަރުކޮށް، ގުއަންޓަނަމޯ ޖަލަށް ގެންދަނީ
30 ޖެނުއަރީ 2025
|
އެންމެ މަޤްބޫލު
ޤަވާޢިދާ ޚިލާފަށް އެމެރިކާއަށް އެތެރެވެފައިވާ ބޭރު ޤައުމުތަކުގެ މީހުން ހޯދުމަށް މިހާރު ކުރިއަށް ގެންދާ އޮޕަރޭޝަންގައި، ހައްޔަރުކުރެވޭ މީހުންގެ ތެރެއިން 30،000 އެއްހާ މީހުން، ގުވަންޓަނަމޯ ބޭ ގައި ހުންނަ އަސްކަރީ ޖަލަށް ގެންދަން ރައީސް ޑޮނަލްޑް ޓްރަމްޕް ނިންމަވައިފިއެވެ.
ގުވަންޓަނަމޯ ޖަލު، މުޅި ދުނިޔެއަށް މަޝްހޫރު ވެފައިވަނީ، ޓެރަރިޒަމްގެ ތުހުމަތުގައި އެމެރިކާގައި ހައްޔަރުކުރާ މީހުން ބައިތިއްބާ ޖަލުގެ ގޮތުގައެވެ. އެތަން ބޭނުންކުރަން ފަށާފައިވަނީ، މަތިންދާބޯޓުތަކެއް ހައިޖެކްކޮށް، އެ ބޯޓުތައް އެމެރިކާގެ ވޯލްޑް ޓްރޭޑް ސެންޓަރާއި ޕެންޓަގަން އަށް ވައްޓާލައިގެން ޙަމަލާދިން ފަހުންނެވެ.
ޓްރަމްޕް ވަނީ، ޤަވާޢިދާ ޚިލާފަށް އެމެރިކާއަށް އެތެރެވެފައިވާ ބޭރު ޤައުމުތަކުގެ މީހުން ހައްޔަރުކޮށް، ޝަރީއަތަކާ ނުލައި އެ ޖަލުގައި ބަންދުކޮށްފައި ބޭތިއްބުމުގެ ޤަރާރެއް ނެރުއްވައިފައެވެ.
އެ ޤަރާރުގައި ޓްރަމްޕް ވަނީ، ގުވަންޓަނަމޯ ޖަލުގައި ޤަވާޢިދާ ޚިލާފަށް އެމެރިކާގައި އުޅޭ 30،000 ބިދޭސީން ބޭތިއްބޭނެ އިންތިޒާމު އެ ޖަލުގައި ހަމަޖެއްސުމަށް ކަމާގުޅޭ އިދާރާތަކަށް އަންގަވައިފައެވެ.
"އެމެރިކާގެ ރައްޔިތުންނަށް ނުރައްކާ ކުރިމަތިކުރާ، ޤަވާޢިދާ ޚިލާފަށް އެތެރެވެފައިތިބި ނުރައްކާތެރި ކުށްވެރިން ބޭތިއްބުމަށް، ގުވަންޓަނަމޯގައި 30،000 އެނދު އެބަހުރި. އޭގެ ތެރެއިން ބައެއް މީހުންގެ ނުރައްކާތެރި ކަމުން، އެ މީހުން ނިސްބަތްވާ ޤައުމުތަކަށް އެ މީހުން ހިފެހެއްޓިދާނެކަމުގެ އިތުބާރެއް ނެތް. އެއީ އެ މީހުން އެނބުރި އަނެއްކާވެސް އެމެރިކާއަށް އައުމުގެ ފުރުޞަތު ދޭން ބޭނުންނުވާތީ،" ޓްރަމްޕް ވިދާޅުވިއެވެ.
ކެމްޕޭނު ތެރޭގައި، އެންމެ އިސްކަމެއް ދެއްވާނީ އެމެރިކާއަށް ހިފެހެއްޓުމެއް ނެތި އެތެރެވަމުންދާ ބާރު ޤައުމުތަކުގެ މީހުން ހުއްޓުވުން ކަމަށް ވިދާޅުވެފައިވާ ޓްރަމްޕް ވެރިކަމާ ޙަވާލުވެވަޑައިގެންނެވުމާ އެކު، އެމެރިކާއިން ހިމާޔަތް ހޯދުމަށް އެދޭ މީހުންނަށް ކުރީގެ ސަރުކާރުން ހަދާފައިވާ އެޕް ވެސް ވަނީ ޑައުންކޮށްލައިފައެވެ.
އޭގެފަހުން، ވައިޓް ހައުސްގެ ޑެޕިޔުޓީ ޕްރެސް ސެކްރެޓަރީ އެނާ ކެލީ ވަނީ، އެމެރިކާއިން ބޭރު ޤައުމުތަކުގެ މީހުންނަށް ހިމާޔަތް ދިނުން މި ސަރުކާރުން ހުއްޓައިލާނެ ކަން އިޢުލާނުކުރައްވައިފައެވެ.