އެމެރިކާއިން ބޭރު ޤައުމުތަކަށާއި ބައިނަލްއަޤުވާމީ ޖަމްޢިއްޔާތަކަށް އެހީ ދިނުން މެދުކަނޑައިލަން ނިންމި ނިންމުމާ ގުޅިގެން ފާޑުކިޔުންތައް އަމާޒުވުމުން، އެމެރިކާއިން ބޭރުގެ އެކި ފަރާތްތަކަށް ދެމުންދާ އިންސާނީ އެހީ އިސްތިސްނާކޮށްފިއެވެ.

އެމެރިކާއިން ބޭރު ޤައުމުތަކުގައި ހިންގަމުންދާ އެހީގެ ޕްރޮގުރާމުތަކާއި ތަރައްޤީގެ މަޝްރޫޢުތައް އަލުން މުރާޖާ ކުރުމަށް އަމުރު ކުރައްވައި، އެމެރިކާގެ ރައީސް ކަމަށް އެނބުރިވަޑައިގެން ރައީސް ޑޮނަލްޑް ޓްރަމްޕް ވަނީ ޤަރާރެއް ނެރުއްވައިފައެވެ.

ޓްރަމްޕްގެ ޤަރާރާ އެކު ބޭރުގެ އެހީ މެދުކަނޑައިލި ލިސްޓުން އިސްތިސްނާ ކޮށްފައިވަނީ، އިޒްރޭލާއި މިޞްރު އެކަންޏެވެ.

އެކަމާ ގުޅިގެން އދ.ގެ އެހީ ދޭ ޖަމާޢަތްތަކުން ވެސް ކަންބޮޑުވުންފާޅު ކުރަމުން ދަނިކޮށް، އެމެރިކާގެ ޚާރިޖީ ވަޒީރު މާކް ރޫބިއޯ ވަނީ މެދުކަނޑައިލަން ނިންމާފައިވާ އެހީގެ ތެރޭގައި އިންސާނީ އެހީ ނުހިމެނޭ ކަމަށް, މެމޯއެއްގެ ޒަރިއްޔާއިން، އަންގަވައިފައެވެ.

މި އިސްތިސްނާގެ ތެރޭގައި، އަސާސީ ބޭހާއި، ކާބޯތަކެއްޗާއި، ވަގުތީ ބޯހިޔާވަހިކަމުގެ އާލަތްތައް ފަދަ އިންސާނީ އެހީ ހިމެނޭނެ ކަމަށް އެމެރިކާގެ ސްޓޭޓް ޑިޕާޓްމަންޓުގެ އޮފިޝަލަކު ވިދާޅުވިއެވެ.

ބޭރު ޤައުމުތަކަށް އެހީތެރިކަން ފޯރުކޮށްދޭ ޤައުމުތަކުގެ ލިސްޓުގެ އެންމެ ކުރީގައި އޮތީ އެމެރިކާއެވެ. އެ ޤައުމުން 2023 ވަނަ އަހަރު ބޭރު ޤައުމުތަކަށް އެހީތެރިކަން ފޯރުކޮށްދިނުމަށް 72 ބިލިޔަން އެމެރިކާ ޑޮލަރު ޚަރަދު ކޮށްފައިވެއެވެ.