އުތުރު ކޮރެޔާ ނިއުކްލިޔަރ ބާރަކަށް ހެދުމުގެ މަސައްކަތް ހުއްޓުމެއްނެތި ކުރިއަށް ގެންދާނެ ކަމަށް، އެ ޤައުމުގެ ލީޑަރު ކިމް ޖޮންގް އުން ވިދާޅުވެއްޖެއެވެ.

އުތުރު ކޮރެޔާގެ ދަޢުލަތުގެ މީޑިޔާއިން ރިޕޯޓުކޮށްފައިވާ ގޮތުގައި، ކިމް ދާދި ފަހުން ވަނީ ނިޔުކްލިޔަރ އާލަތްތައް އުފައްދާ ކާރުޚާނާއަކަށް ޒިޔާރަތް ކުރައްވައިފައެވެ.

އެ ޒިޔާރަތުގައި، އުތުރު ކޮރެޔާ އާ ދެކޮޅު ޤައުމުތަކާ އެކު ވަރުގަދަ "ކުރިމަތިލުމެއް" ހިނގާނެ ކަމުގެ އިންޒާރާ އެކު، މި އަހަރަކީ އުތުރު ކޮރެޔާއަކީ ނިޔުކްލިޔަރ ބާރަކަށް ހެދުމަށް މުހިންމު އަހަރެއްގެ ގޮތުގައި ކިމް ސިފަކުރެއްވި ކަމަށް އެ ނޫހުން ބުނެފައިވެއެވެ.

އެމެރިކާގެ ރައީސްކަމަށް ޑޮނަލްޑް ޓްރަމްޕް އެނބުރިވަޑައިގަތުމާ އެކު އުތުރު ކޮރެޔާއިން ވަނީ ދުރު ހިސާބުތަކަށް ޙަމަލާދެވޭ މިސައިލްތަކެއް ވެސް ޓެސްޓުކޮށްފައެވެ.

ޓްރަމްޕްގެ ފުރަތަމަ ވެރިކަމުގައި ވެސް ގެންގުޅުއްވި ސިޔާސަތާ އެއްގޮތަށް، އުތުރު ކޮރެޔާގެ ނިޔުކްލިޔަރ ޕްރޮގްރާމް ހުއްޓުވަން މަސައްކަތް ކުރާނެކަމަށް އެމެރިކާ ސަރުކާރުން ވަނީ ބުނެފައެވެ.

ވެރިކަމަށް ވަޑައިގެންނެވުމަށްފަހު، ކިމް އަށް ގުޅުއްވައި، މަޝްވަރާ ކުރައްވާނެ ކަމަށް ސީދާ ޓްރަމްޕް ވެސް ވަނީ ވިދާޅުވެފައެވެ.

ޓްރަމްޕްގެ ފުރަތަމަ ވެރިކަމުގައި، ކިމްއާ އެކު ތިން ފަހަރެއްގެ މަތިން ބައްދަލުކުރައްވާފައިވެއެވެ. މިގޮތުން، 2018 ވަނަ އަހަރު ސިންގަޕޫރުގައި ސަމިޓެއް ބާއްވައި، ދެ ލީޑަރުން ވަނީ މަޝްވަރާތައް ކުރައްވައިފައެވެ.

ނަމަވެސް، ދެކުނު ކޮރެޔާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލުމާ މެދު އުފެދުނު ދެބަސްވުންތަކުގައި، ހަނޯއީގައި 2019 ވަނަ އަހަރުގެ ތެރޭގައި ބޭއްވި ސަމިޓު ވަނީ ކުރުކޮށްލައިފައެވެ.