ޣައްޒާގައި ދިރިއުޅޭ ފަލަސްތީނުގެ ރައްޔިތުންގެ "ސަލާމަތަށްޓަކައި" އެ މީހުން ޖޯޑަން އާއި މިޞްރަށް ގެންދިޔުމުގެ ވިސްނުން، އެމެރިކާގެ ރައީސް ޑޮނަލްޑް ޓްރަމްޕް ތަކުރާރު ކުރައްވައިފިއެވެ.

އެ ޚިޔާލު ޓްރަމްޕް އެންމެ ފުރަތަމަ ހުށަހެޅުއްވީ މިދިޔަ ހޮނިހިރު ދުވަހުއެވެ. ޓްރަމްޕް ވިދާޅުވީ، ހަނގުރާމައިގެ ސަބަބުން، މުޅި ޣައްޒާ ސުންނާފަތިވެފައިވާއިރު، އެ ބިރުވެރިކަމާއި ނިކަމެތިކަމުގައި ފަލަސްތީނުގެ އާންމުން ދިރިއުޅެން ޖެހުމަކީ ހިތާމަކުރައްވާ ކަމެއް ކަމަށެވެ.

އެހެންކަމުން، ޣައްޒާގައި ދިރިއުޅޭ ދެ މިލިއަނެއްހާ މީހުން "ވަރަށް ފަސޭހައިން" ޖޯޑަން އަދި މިޞްރަށް ގެންދެވޭނެ ކަމަށް ޓްރަމްޕް ވިދާޅުވިއެވެ.

އަދި އެ މަޝްވަރާތައް ޖޯޑަންގެ ރަސްގެފާނު ޢަބްދުالله އާ ކުރައްވާފައިވާއިރު، މިޞްރުގެ ރައީސް ޢަބްދުލްފައްތާޙް އަލް-ސީސީއަށް ގުޅުއްވައި ބާރު އަޅުއްވާނެ ކަމަށް ޓްރަމްޕް ވަނީ އެ ދުވަހު ވިދާޅުވެފައެވެ.

އެ ޚިޔާލާ ގުޅޭގޮތުން ނޫސްވެރިން މިއަދު ސުވާލު ކުރުމުން، ޓްރަމްޕް ވަނީ އެ ޚިޔާލު ތަކުރާރުކުރައްވައިފައެވެ.

ޓްރަމްޕް ވިދާޅުވީ ޣައްޒާއަށް ބަލާއިރު، އެތަން ސުންނާފަތިވެފައި އޮންނަތާ އެތައް އަހަރެއް ވެއްޖެ ކަމަށާއި އަބަދުވެސް އެތަނާ ގުޅިފައި އޮންނަނީ ހަމަނުޖެހުމާއި ނިކަމެތިކަން ކަމަށެވެ. 

ޓްރަމްޕް ވިދާޅުވި ގޮތުގައި، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ، "ވަރަށް އަވަހަށް" އެމެރިކާއަށް ރަސްމީ ދަތުރެއް ކުރާނެއެވެ. އަދި ފަލަސްތީނާއި އިޒްރޭލާ ގުޅޭ މަޝްވަރާތައް އެ ދަތުރުގެ ތެރެއިން ކުރައްވާނެ ކަމަށް ވެސް ވިދާޅުވިއެވެ.