އެމެރިކާއިން ބޭރު ޤައުމުތަކަށާއި ބައިނަލްއަޤުވާމީ ޖަމްޢިއްޔާތަކަށް އެހީ ދިނުން މެދުކަނޑައިލަން ނިންމި ނިންމުމާ މެދު އދ.ގެ ސެކްރެޓަރީ ޖެނެރަލް އޮންޓޯނިއޯ ގުޓެރޭސް ކަންބޮޑުވުން ފާޅުކުރައްވައިފިއެވެ.

އެމެރިކާއިން ބޭރު ޤައުމުތަކުގައި ހިންގަމުންދާ އެހީގެ ޕްރޮގުރާމުތަކާއި ތަރައްޤީގެ މަޝްރޫޢުތައް އަލުން މުރާޖާ ކުރުމަށް އަމުރު ކުރައްވައި، އެމެރިކާގެ ރައީސް ކަމަށް އެނބުރިވަޑައިގެން ރައީސް ޑޮނަލްޑް ޓްރަމްޕް ވަނީ ޤަރާރެއް ނެރުއްވައިފައެވެ.

އިއްޔެ ބޭއްވި ނޫސްވެރިންގެ ބައްދަލުވުމެއްގައި، ގުޓެރޭސްގެ ތަރުޖަމާނު، ސްޓެފާން ޑުޖާރިކް ވިދާޅުވީ، އެމެރިކާގެ އެ ނިންމުމާދު އދ.ގެ ކަންބޮޑުވުން ބޮޑު ކަމަށެވެ.

އަދި އެމެރިކާއިން ދޭ އެހީ ކަނޑައިލުމުން ކުރިމަތިވާނެ ނޭދެވޭ އަސަރުތައް ދެނެގަތުމުގެ މަސައްކަތް ކުރަމުންދާ ކަމަށް އޭނާ ހާމަކުރެއްވިއެވެ.

ބޭރު ޤައުމުތަކަށް އެހީތެރިކަން ފޯރުކޮށްދޭ ޤައުމުތަކުގެ ލިސްޓުގެ އެންމެ ކުރީގައި އޮތީ އެމެރިކާއެވެ. އެ ޤައުމުން 2023 ވަނަ އަހަރު ބޭރު ޤައުމުތަކަށް އެހީތެރިކަން ފޯރުކޮށްދިނުމަށް 72 ބިލިޔަން އެމެރިކާ ޑޮލަރު ޚަރަދު ކޮށްފައިވެއެވެ.

ޓްރަމްޕްގެ ޤަރާރާ އެކު ބޭރުގެ އެހީ މެދުކަނޑައިލި ލިސްޓުން އިސްތިސްނާ ކޮށްފައިވަނީ، އިޒްރޭލާއި މިޞްރު އެކަންޏެވެ.

މިގޮތުން، ފަލަސްތީނުގައި އިޒްރޭލުން ދެމުންދާ ލާއިންސާނީ ޢުދުވާނުތަކަށް އަސްކަރީ އެހީ ދިނުން އެމެރިކާއިން ކުރިއަށް ގެންދާނެއެވެ.