އެމެރިކާގެ ރިޔާސީ އިންތިހާބު ދެވަނަ ފަހަރަށް ޑޮނަލްޑް ޓޮރަމްޕް ކާމިޔާބު ކުރައްވައިފިއެވެ.

އިންތިހާބުގެ ވަގުތީ ނަތީޖާދައްކާގޮތުން ޓްރަމްޕަށް 267 އިލެކްޓްރަލް ވޯޓު ލިބިފައިވާއިރު ކަމާލާ ހަރިސް އަށް ލިބިފައިވަނީ 219 އިލެކްޓްރަލް ވޯޓެވެ. އިންތިހާބު ކާމިޔާބުކުރުމަށް ބޭނުންވަނީ 270 އިލެކްޓްރަލް ވޯޓުކަމަށްވާ އިރު ބާކީ ހުރި ވޯޓުތަކުން ޓްރަމްޕަށް ކާމިޔާބު ލިބޭނެކަން ވަނީ ޔަގީންވެފަ އެވެ.

މިއީ ޓްރަމްޕް ރިޔާސީ އިންތިހާބުގައި ވާދަކުރެއްވި ތިން ވަނަ ފަހަރެވެ. އެންމެ ފަހުން 2020 ވަނަ އަހަރު އޮތް ރިޔާސީ އިންތިހާބުގައި ވާދަކޮށް ނާކާމިޔާބީއާ ކުރިމަތިލާން ޖެހުނީ 74 އިލެކްޓްރަލް ވޯޓުގެ ފަރަގަކުންނެވެ. ނަމަވެސް ޓްރަމްޕް ވަނީ 2016 ގައި ބޭއްވި ރިޔާސީ އިންތިހާބުގައި ހިލަރީ ކްލިންޓަންއާ ވާދަކޮށް އެ އަހަރުގެ އިންތިހާބު ކާމިޔާބުކޮށްފައެވެ.

އެހެންކަމުން މިއީ ޓްރަމްޕް ރިޔާސީ އިންތިހާބު ކާމިޔާބުކޮށް ވެރިކަންކުރާ ދެވަނަ ފަހަރެވެ.