ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލްގެ މައްޗަށް ފިތުނަ އުފެއްދުމުގައި އެންމެ އިސްކޮށް އުޅުނު ކަމުގެ ދަޢުވާ އުފުލައިފިއެވެ.

ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އެ މަނިކުފާނުގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

އެ މައްސަލައިގެ ތަހުޤީޤު ފަށައި، އެތައް ދުވަހެއްގެ މަސައްކަތަށް ފަހު، ޔޫން މިހާރު ހުންނެވީ ހައްޔަރުކޮށްފައެވެ.

ޕްރޮސެކިޔުޓަރުންގެ ފަރާތުން ނެރުނު ބަޔާނެއްގައި ބުނީ، ފިތުނަ އާއި ހަމަނުޖެހުން އުފެއްދުމުގައި އެންމެ އިސްކޮށް އުޅުނު ކަމުގެ ދަޢުވާ އުފުލާފައިވާ ކަމަށެވެ.

މިއީ ރައީސަކަށް ލިބިވަޑައިގަންނަވާ އިމްތިޔާޒްތަކުގެ ނުހިމެނޭ ދަޢުވާއެއް ކަމަށް ވެސް ޕްރޮސެކިޔުޓަރުން ބުންޏެވެ.

ދެކުނު ކޮރެޔާގައި ފިތުނަ އުފެއްދުމަކީ މަރުގެ އަދަބު ކަނޑައެޅޭނެ ޖިނާޢީ ކުށެކެވެ.

ޔޫންގެ ޤާނޫނީ ޓީމުން ބުނީ، ފިތުނަ އުފެއްދުމުގެ ދަޢުވާ ކުރެވޭނެ ކަމަށް ޤަބޫލުނުކުރާ ކަމަށާއި، އެކަމާ ދެކޮޅަށް ކޯޓު މަރުޙަލާގެ ތެރެއިން މަސައްކަތް ކުރާނެ ކަމަށެވެ.

ފިތުނަ އުފެއްދުމުގެ ދަޢުވާގެ އިތުރުން، އަޒުލުކުރި މައްސަލައިގެ އަޑުއެހުންތައް ވެސް ވަނީ ފަށައިފައެވެ.

ދެކުނު ކޮރެޔާގެ ޤާނޫނުއަސާސީގެ ދަށުން ރައީސްކަމުން އަޒުލުކުރިޔަސް، އެކަމާ މެދު ފަހު ބަސް ބުނާނީ ދެކުނު ކޮރެޔާގެ ދުސްތޫރީ ކޯޓުންނެވެ.

އެ ކޯޓުން ވަނީ، ޖެނުއަރީ 14 އިން ފެށިގެން ފެބްރުއަރީ 4 އާ ދެމެދު ފަސް އަޑުއެހުމެއް ތާވަލުކޮށްފައެވެ.

މި މައްސަލައިގައި ގޮތެއް ނިންމަން ކޯޓަށް 180ގެ މުއްދަތެއް ލިބޭނެއެވެ.