ޙަމާސް ޖަމާޢަތުން ރަހީނުކޮށްފައިވާ އިތުރު ހަ މީހަކު ދޫކޮށްލުމުގެ ބަދަލުގައި، ޣައްޒާގެ ދެކުނުގައި ދިރިއުޅޭ ފަލަސްތީނުގެ ރައްޔިތުން އަނބުރާ އެ މީހުންގެ ގެދޮރަށް ދިޔުމުގެ ފުރުޞަތު ދޭން އެއްބަސްވެފައިވާކަމަށް އިޒްރޭލުން ބުނެފިއެވެ.

ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމަށް މި މަހުގެ 19 ވަނަ ދުވަހުން ފެށިގެން ޢަމަލުކުރަން ފަށާފައިވާއިރު، ޙަމާސްއިން ރަހީނުކޮށްފައިވާ އިޒްރޭލު މީހުންނާއި، އިޒްރޭލުގެ ޖަލުތަކުގައި ބަންދުކޮށްފައިތިބި ޤައިދީންތަކެއް ދެ ބުރެއްގެ މަތިން ވަނީ މިނިވަންކޮށްފައެވެ.

މިގޮތުން، އެއްބަސްވުމުގެ ދަށުން، މިހާތަނަށް އިޒްރޭލުގެ ހަތް އަންހެނަކު ވަނީ މިނިވަންކޮށްފައެވެ. އަދި އޭގެ ބަދަލުގައި އިޒްރޭލުން ވަނީ ފަލަސްތީނުގެ 290 ޤައިދީން މިނިވަންކޮށްފައެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ، މި ހަފްތާގެ ތެރޭގައި އިތުރު ހަ ރަހީނަކު މިނިވަންކުރަން ޙަމާސްއިން އެއްބަސްވެފައިވާ ކަމަށެވެ. އޭގެ ބަދަލުގައި، ހަނގުރާމައިގެ ސަބަބުން ދެކުނު ޣައްޒާ ދޫކޮށް ދާން މަޖުބޫރުވި އެތަކެއް ހާސް ފަލަސްތީނުގެ ރައްޔިތުންނަށް އެނބުރި ގެދޮރަށް ދިޔުމުގެ ފުރުޞަތު ދޭން ނިންމާފައިވާ ކަމަށް އެ އޮފީހުން ބުންޏެވެ.

ސުލްޙައިގެ އެއްބަސްވުމަށް ޢަމަލުކުރަން ފެށިޔަސް، ޣައްޒާގެ ދެކުނަށް ދެވެން އޮންނަ މަގުތައް އިޒްރޭލުން ބަންދުކޮށްގެން ތިބީ، ޙަމާސްއިން އެއްބަސްވުމާ ޚިލާފަށް ރަހީނުކޮށްފައިތިބި އަންހެނުން މިނިވަން ކުރަން ދެކޮޅު ހަދާފައިވާ ކަމަށް ބުނެއެވެ.

ޣައްޒާގައި ޙަމަލާތައް ހުއްޓައިލުމުގެ އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ.

ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.

ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.