އެމެރިކާގެ ރިޔާސީ އިންތިހާބު ކާމިޔާބު ކުރެއްވި ޑޮނަލްޑް ޓްރަމްޕަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެ އެވެ. 

ރައީސް މުޢިއްޒު މަރުހަބާ ވިދާޅުވެފައި ވަނީ އިޖްތިމާޢީ މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައެވެ.

ރައީސް މުޢިއްޒުގެ ޕޯސްޓުގައި ވިދާޅުވެފައި ވަނީ، ރައީސްކަމަށް އިންތިޚާބުވެވަޑައިގަތުމުން ޓްރަމްޕަށް ހޫނު މަރުޙަބާއެއް ދަންނަވަން. ދިވެހިރާއްޖެ އާއި އެމެރިކާއާ ދެމެދު އޮތީ އެއް ޤައުމު އަނެއް ޤައުމާއި އިޙްތިރާމްކުރުމާއި، ހެޔޮ އެދުމާ އަދި  ދެނެގަތުމުގެ މައްޗަށް ބިނާވެފައިވާ ވަރުގަދަ ގުޅުމެއް ކަމަށެވެ.

މީގެ އިތުރުން ރައީސް މުޢިއްޒު ވިދާޅުވެފައިވަނީ ދެ ޤައުމުގެ ގުޅުން އިތުރަށް ބަދަހިކުރުމަށާއި، ދެ ޤައުމަށް ކުރިމަތިވެފައިވާ ގޮންޖެހުންތަކާ ކުރިމަތިލުމަށާ، އަދި ދުނިޔޭގެ ސުލްޙަ އާއި ކުރިއެރުން އިތުރުކުރުމަށް މަސައްކަތްކުރުމަށް އުންމީދުކުރައްވާ ކަމަށެވެ.

އެމެރިކާގެ އިންތިޚާބުގެ އެންމެ ފަހުގެ ނަތީޖާތަކަށް ބަލާއިރު, ޓްރަމްޕް ވަނީ 67.3 މިލިޔަން މީހުންގެ ތާޢީދު ހޯއްދަވައިފައެވެ. މިހާތަނަށް ގުނާފައިވާ ނަތީޖާތަކަށް ބަލާއިރު, ޑިމޮކްރެޓިކް ކެންޑިޑޭޓް ކަމަލާ ހެރިސް އަށް ވޯޓު ދީފައި ވަނީ 62.1 މިލިޔަން މީހުންނެވެ.

އިންތިޚާބުގައި ކާމިޔާބީ ހޯދައި, ރައީސް ކަމުގެ މަޤާމު ކަށަވަރު ކުރައްވާ ކެނޑިޑޭޓަކު, 270 އިލެކްޓޯރަލް ކޮލެޖު ވޯޓު ކާމިޔާބު ކުރައްވަން ޖެހިވަޑައިގަންނަވާނެއެވެ. ޓްރަމްޕަށް މި ވަގުތު ލިބިވަޑައިގެންފައި ވަނީ 266 އިލެކްޓޯރަލް ކޮލެޖުގެ ވޯޓެވެ. އިތުރު ހަތަރު އިލެކްޓޯރަލް ކޮލެޖުގެ ވޯޓާ އެކު އޭނާއަށް އިންތިޚާބު ކާމިޔާބު ކުރެއްވޭނެއެވެ. ހެރިސް އަށް ލިބިވަޑައިގެންފައި ވަނީ 188 އިލެކްޓޯރަލް ކޮލެޖު ވޯޓެވެ.

ފްލޮރިޑާގެ ހުޅަނގު ޕާމް ބީޗުގައި ރިޕަބްލިކަން ޕާޓީގެ މެންބަރުންނާ މުޚާޠަބު ކުރައްވައި ވާހަކަފުޅު ދައްކަވަމުން ޓްރަމްޕް ވަނީ, މިއީ އެ ޕާޓީއަށް ލިބިފައިވާ ބޮޑު ކާމިޔާބީއެއްގެ ގޮތުގައި ސިފަކުރައްވާފައެވެ.

"އެމެރިކާގެ ރައްޔިތުން މި ވަނީ ބޮޑެތި ބާރުތަކެއް އަދި ޒިންމާތަކެއް [ރިޕަބްލިކަން ޕާޓީއަށް] ދީފައި. އަޅުގަނޑުމެންނަށް މި ވަނީ ސެނެޓުގެ ކޮންޓުރޯލް ލިބިފައި. ހާދަ ރަނގަޅޭ،" ޓްރަމްޕް ވިދާޅުވިއެވެ.

ސެެނެޓުގެ އިންތިޚާބުގައި މޮންޓާނާ, ނެވާޑާ, ޓެކްސަސް, އޮހާޔޯ, މިޝިގަން އަދި ވިސްކޮންސިނާއި ޕެންސިލްވޭނިޔާގައި ވެސް ކާމިޔާބީ ހޯއްދަވާފައި ވަނީ ޓްރަމްޕްގެ ޕާޓީންނެވެ.