ENGLISH

04 އޭޕްރީލު 2025

Advertisement

އިޒްރޭލު ސިފައިން ފައިބަން ދެކޮޅު ހެދިޔަސް، ސުލްޙައިގެ އެއްބަސްވުން އިތުރުކުރަން ލުބްނާނުން ނިންމައިފި

27 ޖެނުއަރީ 2025

|

ހަސަން އާމިރު

އިޒްރޭލާއި، ލުބްނާނުގައި ޙަރަކާތްތެރިވާ ހަނގުރާމަވެރި ޖަމާޢަތް، ޙިޒްބުﷲ އާ ދެމެދު ޙަމަލާތައް ހުއްޓައިލުމުގެ އެއްބަސްވުމުގެ ދަށުން، ލުބްނާނުގެ ދެކުނުގައި ތިބި އިޒްރޭލު ސިފައިން ފައިބަން ދެކޮޅު ހެދިޔަސް، އެއްބަސްވުމުގެ މުއްދަތު އިތުރުކުރަން އެއްބަސްވެއްޖެއެވެ.

އިޒްރޭލާއި ޙިޒްބުالله އާ ދެމެދު އަހަރަކަށް ވުރެ ގިނަ ދުވަސް ވަންދެން ކުރަމުންދިޔަ ހަނގުރާމަ، އެމެރިކާ އާއި ފްރާންސް އިސްވެ އޮވެ ހަނގުރާމަ ހުއްޓާލުމުގެ އެއްބަސްވުމެއް ޤާއިމުކުރީ މިދިޔަ ނޮވެމްބަރު މަހުގެ ތެރޭގައެވެ.

އެ އެއްބަސްވުމުގެ ދަށުން ލުބްނާނުގެ ލީތާނީ ކޯރުގެ ދެކުނުގެ ސަރަޙައްދުތަކުން ޙިޒްބުاللهގެ ހަނގުރާމަވެރިން ފައިބައި ހަތިޔާރުތައް އެހެން ސަރަޙައްދަކަށް ގެންދަން ޖެހެއެވެ. އޭގެ އިތުރުން އިޒްރޭލު ސިފައިން ވެސް ލުބްނާނުގެ ދެކުނުގެ ސަރަޙައްދުތަކުން ފައިބަން ޖެހެއެވެ. އެ ސަރަޙައްދުގައި ދެން ޙަރަކާތްތެރި ވާނީ ލުބްނާނުގެ އަސްކަރިއްޔާއިން ކަމަށް އެެއްބަސްވުމުގައި ބުނެފައިވެއެވެ.

އެކަމަށްދީފައިވާ 60 ދުވަހުގެ މުއްދަތު، އިއްޔެ ވަނީ ހަމަވެފައެވެ.

މުއްދަތު ހަމަވިއިރު، އެ ސަރަޙައްދުން ފައިބަން ދެކޮޅު ހެދުމުގެ އިތުރުން، އެ ސަރަޙައްދުގައި ދިރިއުޅޭ ބައެއް އާންމުން އެނބުރި ގެދޮރަށް ދާން މަސައްކަތް ކުރުމުން، އިޒްރޭލު ސިފައިން ބަޑިޖަހައި 22 މީހަކު މަރާލާފައިވާ ކަމަށް ލުބްނާނުން ބުންޏެވެ. އެ ޙަމަލާތަކުގައި 100 އަށް ވުރެ ގިނަ މީހުން ވަނީ ޒަޚަމްވެފައެވެ.

އިޒްރޭލުން މި ޖަރީމާތައް ހިންގިޔަސް، އެމެރިކާ އާ އެކު ކުރި މަޝްވަރާތަކަށް ފަހު، ސުލްޙައިގެ އެއްބަސްވުން އަންނަ މަހުގެ 18 ވަނަ ދުވަހާ ހަމައަށް އިތުރުކޮށް، ޢަމަލުކުރަމުންދާނެ ކަމަށް ލުބްނާނުގެ ވަގުތީ ބޮޑުވަޒީރު ނަޖީބު މިކާޓީ ވިދާޅުވިއެވެ.

ކިޔުންތެރިންގެ ހިޔާލު