ސޫރިޔާގެ ކުރީގެ ރައީސް ބައްޝާރް އަލް އަސަދުގެ ދިގު ވެރިކަން ނިމުމަކަށް އައުމާ ގުޅިގެން، ސޫރިޔާ އަލުން އާރާސްތުކުރަން ރަނގަޅު ފުރުޞަތެއް ލިބިފައިވާ ކަމަށް ވިދާޅުވެ، ހުޅަނގުގެ ގިނަ ޤައުމުތަކަކުން ސޫރިޔާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލަން، އދ.ގެ ރެފިޔުޖީ އޭޖެންސީގެ ވެރިޔާ ފިލީޕޯ ގްރާންޑީ ގޮވާލައްވައިފިއެވެ.

ސޫރިޔާގައި މި ވަގުތު ވެރިކަން ކުރަމުން ދަނީ ހަނގުރާމަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސް) އިން ޤާއިމު ކޮށްފައިވާ ވަގުތީ ސަރުކާރަކުންނެވެ. އެޗްޓީއެސްއިން އެ ޤައުމުގެ ކުރީގެ ރައީސް ބައްޝާރް އަލް-އަސަދުގެ ވެރިކަމަށް ނިމުމެއް ގެނެސްފައި ވަނީ ޑިސެންބަރު 8 ވަނަ ދުވަހުއެވެ.

ސޫރިޔާގެ ވެރިރަށް ދިމިޝްޤަށް ކުރެއްވި ދަތުރުގެ ތެރެއިން ނޫސްވެރިންނާ ވާހަކަ ދައްކަވަމުން، ގްރާންޑީ ވިދާޅުވީ އަސަދުގެ ވެރިކަން ނިމުނަސް، ދުނިޔޭގެ އެކި ކަންކޮޅުތަކަށް ހިޖުރަކޮށްފައި ތިބި ސޫރިޔާގެ ރައްޔިތުން އެނބުރި ޤައުމަށް އައުމަށް އޮތް އެންމެ ބޮޑު އެއް ހުރަހަކީ، ހުޅަނގުގެ ޤައުމުތަކުން އަޅާފައިވާ ދަތިކުރުމުގެ ފިޔަވަޅުތައް ކަމަށެވެ.

"ދަތިކުރުމުގެ ފިޔަވަޅުތައް އުވާލައިފި ނަމަ މީހުން އެނބުރި އަންނަ ތަންތަނުގެ ޙާލަތު ރަނގަޅުވާނެ،" ގްރާންޑީ ވިދާޅުވި އެވެ.

"އެއީ މީހުން އެނބުރި އައުމަށް އިތުރު ހިތްވަރަކަށް ވެގެންދާނެ ކަމެއް."

އޭނާ ވިދާޅުވި ގޮތުގައި، ދަތިކުރުމުގެ ފިޔަވަޅުތައް އަޅާފައިވަނީ ކުރިން އޮތް ޙާލަތަށް ބަލައިފައެވެ. ނަމަވެސް، މިހާރު އޭރު އޮތް ޙާލަތު ބަދަލުވެފައިވާތީ، އެ ނިންމުން މުރާޖަޢާކޮށް، މީހުން އެނބުރި އައުމަށް މަގިފަހިކޮށްދޭންޖެހޭ ކަމަށް އޭނާ ވިދާޅުވިއެވެ.

ސޫރިޔާގެ އިންތިޤާލީ ސަރުކާރުން ވެސް ވަނީ، އަސަދުގެ ސަރުކާރުގައި އަޅާފައިވާ ދަތިކުރުމުގެ ފިޔަވަޅުތައް އުވައިލަން ތަކުރާރުކޮށް ގޮވާލައިފައެވެ.

ނަމަވެސް، ބައިނަލްއަޤުވާމީ މުޖުތަމަޢުގެ އިތުރުން ސޫރިޔާގެ ރައްޔިތުންނަށް އެޗްޓީއެސްގެ ސަރުކާރުން ވެފައިވާ ވަޢުދުތައް ފުއްދަން ފެށުމުގެ ކުރިން، އެ ފިޔަވަޅުތައް އުވައިލަން ހުޅަނގުގެ ގިނަ ޤައުމުތަކުން ވަނީ ފަހަތު ފަޔަށް ބުރަވެފައެވެ.