ENGLISH

04 އޭޕްރީލު 2025

Advertisement

ޣައްޒާ ސުލްޙައިގެ އެއްބަސްވުމުގެ ދެވަނަ ބުރުގެ ރަހީނުންނާއި ޤައިދީން މިނިވަންކޮށްފި

26 ޖެނުއަރީ 2025

|

ހަސަން އާމިރު

ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމުގެ ދެވަނަ ބުރުގައި ހިމެނޭ، ޙަމާސް ޖަމާޢަތުން ރަހީނުކޮށްފައިވާ އިޒްރޭލު މީހުންނާއި، އިޒްރޭލުގެ ޖަލުތަކުގައި ބަންދުކޮށްފައިތިބި ޤައިދީން މިނިވަންކޮށްފިއެވެ.

އިޒްރޭލުން ޣައްޒާއަށް ހުއްޓުމެއްނެތި ޙަމަލާތައް ދޭން ފެށިތާ 15 މަސް ދުވަސް ފަހުން، ގިނަ ޤައުމުތަކެއް މެދުވެރިވެގެން، ސުލްޙައިގެ އެއްބަސްވުމެއް އެކުލަވާލައި، ޢަމަލުކުރަން ފަށާފައިވަނީ މިދިޔަ އާދީއްތަ ދުވަހުއެވެ.

އެއްބަސްވުމުގެ ދަށުން، ހަމަ އެ ދުވަހު ޙަމާސް އިން ވަނީ ތިން އަންހެނަކު މިނިވަންކޮށްފައެވެ. އަދި އޭގެ ބަދަލުގައި އިޒްރޭލުން ވަނީ ފަލަސްތީނުގެ 90 ޤައިދީން މިނިވަންކޮށްފައެވެ.

މި އެއްބަސްވުމުގެ ދެވަނަ ބުރުގެ ދަށުން، އިއްޔެގެ ވަގުތެއްގައި ޙަމާސްއިން ވަނީ އިތުރު ހަތަރު އަންހެނަކު މިނިވަންކޮށްފައެވެ. އޭގެތެރޭގައި ހިމެނެނީ، އިޒްރޭލު ސިފައިންގެ ހަތަރު އަންހެނެކެވެ. އޭގެ ބަދަލުގައި އިޒްރޭލުން ވަނީ 200 ޤައިދީން މިނިވަންކޮށްފައެވެ. އޭގެތެރޭގައި ހިމެނެނީ 99 ފަލަސްތީނު މީހުންނާއި ޖޯޑަންގެ ރައްޔިތެކެވެ.

މިނިވަންކުރި ޤައިދީންގެ ތެރޭގައި ގިނައީ، އިޒްރޭލާ ދެކޮޅަށް ޙަމަލާދިން ކަމުގެ ތުހުމަތުގައި އުމުރަށް ޖަލަށްލާފައިވާ މީހުން ކަމަށް އިޒްރޭލުން ބުންޏެވެ.

އެއްބަސްވުމުގެ ފުރަތަމަ ފިޔަވަހީގެ ދަށުން 33 ރަހީނުން މިނިވަންކުރަން ހަމަޖެހިފައިވާއިރު، އިޒްރޭލުގެ ޖަލުތަކުން 1،900 އެއްހާ ފަލަސްތީނުގެ ޤައިދީން މިނިވަންކުރާނެ ކަމަށް މަޢުލޫމާތު ލިބިފައިވެއެވެ.

މަޝްވަރާތަކުގެ ތަފްޞީލު އެނގޭ އެކި މަސްދަރުތަކުން ލިބޭ މަޢުލޫމާތުތަކަށް ބަލާއިރު، މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ.

ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.

ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.

ކިޔުންތެރިންގެ ހިޔާލު