އިޒްރޭލާއި، ލުބްނާނުގައި ޙަރަކާތްތެރިވާ ހަނގުރާމަވެރި ޖަމާޢަތް، ޙިޒްބުﷲ އާ ދެމެދު ޙަމަލާތައް ހުއްޓައިލުމުގެ އެއްބަސްވުމުގެ ދަށުން، ލުބްނާނުގެ ދެކުނުގައި ތިބި އިޒްރޭލު ނުފައިބާނެ ކަމަށް ބުނެފިއެވެ.

އިޒްރޭލާއި ޙިޒްބުالله އާ ދެމެދު އަހަރަކަށް ވުރެ ގިނަ ދުވަސް ވަންދެން ކުރަމުންދިޔަ ހަނގުރާމަ، އެމެރިކާ އާއި ފްރާންސް އިސްވެ އޮވެ ހަނގުރާމަ ހުއްޓާލުމުގެ އެއްބަސްވުމެއް ޤާއިމުކުރީ މިދިޔަ ނޮވެމްބަރު މަހުގެ ތެރޭގައެވެ.

އެ އެއްބަސްވުމުގެ ދަށުން ލުބްނާނުގެ ލީތާނީ ކޯރުގެ ދެކުނުގެ ސަރަޙައްދުތަކުން ޙިޒްބުاللهގެ ހަނގުރާމަވެރިން ފައިބައި ހަތިޔާރުތައް އެހެން ސަރަޙައްދަކަށް ގެންދަން ޖެހެއެވެ. އޭގެ އިތުރުން އިޒްރޭލު ސިފައިން ވެސް ލުބްނާނުގެ ދެކުނުގެ ސަރަޙައްދުތަކުން ފައިބަން ޖެހެއެވެ. އެ ސަރަޙައްދުގައި ދެން ޙަރަކާތްތެރި ވާނީ ލުބްނާނުގެ އަސްކަރިއްޔާއިން ކަމަށް އެެއްބަސްވުމުގައި ބުނެފައިވެއެވެ.

އެކަމަށްދީފައިވާ 60 ދުވަހުގެ މުއްދަތު، މާދަމާ ހަމަވާނެއެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނީ އެއްބަސްވުމުގައިވާ ކަންތަައްތައް ފުރިހަމައަށް ތަންފީޒުކޮށްފައި ނުވާ ކަމަށެވެ.

އެހެންކަމުން، ލުބްނާނުގެ ދެކުނުގެ ސަރަޙައްދުތަކުން ސިފައިން ނުބާލާނެ ކަމަށް އެ ބަޔާނުގައި ބުންޏެވެ.

ޙިޒްބުﷲ އިން މީގެކުރިން ބުނެފައިވާ ގޮތުގައި، އިޒްރޭލު ސިފައިން ނުފައިބައިފިނަމަ، އެއްބަސްވުމާ ޚިލާފުވި ކަމަށް ބަލައި، ބައިނަލްއަޤުވާމީ ގޮތުން އެޅެން ހުރި ފިޔަވަޅުތައް އިޒްރޭލާ ދެކޮޅަށް އަޅާނެ އެވެ.