އިޒްރޭލާއި މިޞްރު ފިޔަވައި، އެމެރިކާއިން ބޭރު ޤައުމުތަކަށް އެހީ ދިނުން މެދުކަނޑާލާފައިވާ ކަމަށް ބައެއް ރިޕޯޓުތައް ބުނެފިއެވެ.

އެމެރިކާގެ ޚާރިޖީ ވަޒީރު މާކޯ ރޫބިއޯ ސޮއިކޮށްފައިވާ އަމުރެއް ލީކުވެފައިވާ ކަމަށް ބައެއް މީޑިއާތަކުން ރިޕޯޓުކޮށްފައިވެއެވެ.

އެ އަމުރު ނެރެފައިވަނީ، އެމެރިކާއިން ބޭރު ޤައުމުތަކުގައި ހިންގަމުންދާ އެހީގެ ޕްރޮގުރާމުތަކާއި ތަރައްޤީގެ މަޝްރޫޢުތައް އަލުން މުރާޖާ ކުރުމަށް އަމުރު ކުރައްވައި، ރައީސް ޑޮނަލްޑް ޓްރަމްޕް ޤަރާރެއް ނެރުއްވުމާ ގުޅިގެންނެވެ.

ޚާރިޖީ ވުޒާރާގެ އަމުރާ އެކު، ބޭރު ޤައުމުތަކަށް އަސްކަރީ އެހީތެރިކަން ފޯރުކޮށްދިނުން ވެސް އެމެރިކާއިން މި ވަނީ މެދުކަނޑައިލާފައެވެ. ނަމަވެސް، އެ ކަމުން އިޒްރޭލު ވަނީ އެ އަމުރުގައި އިސްތިސްނާކޮށްފައެވެ.

މި ނިންމުމާ ގުޅިގެން، ބޭރު ޤައުމުތަކުގައި ހާލުގައި ޖެހިފައިވާ ނިކަމެތީންގެ ފުރާނަ ސަލާމަތް ކުރުމަށް އެހީތެރިކަން ފޯރުކޮށްދިނުމަށް އެމެރިކާއިން ހިންގަމުން ދިޔަ އެތަކެއް ބިލިޔަން ޑޮލަރުގެ ޕްރޮގުރާމުތަކަށް މި ވަނީ ހުއްޓިފައެވެ.

ބޭރު ޤައުމުތަކަށް އެހީތެރިކަން ފޯރުކޮށްދޭ ޤައުމުތަކުގެ ލިސްޓުގެ އެންމެ ކުރީގައި އޮތީ އެމެރިކާއެވެ. އެ ޤައުމުން 2023 ވަނަ އަހަރު ބޭރު ޤައުމުތަކަށް އެހީތެރިކަން ފޯރުކޮށްދިނުމަށް 72 ބިލިޔަން އެމެރިކާ ޑޮލަރު ޚަރަދު ކޮށްފައިވެއެވެ.