އެމެރިކާގެ ކޮންގްރެސްގެ މުސްލިމް ދެ މެންބަރުންގެ ގޮނޑި ދިފާއު ކޮށްފި އެވެ.

ރަޝީދާ ޓްލައިބް އަދި އިލްހާން އުމަރު އަކީ އެމެރިކާގެ ކޮންގްރެސްގައި ޚިދުމަތްކުރާ އެންމެ ފުރަތަމަ މުސްލިމް އަންހެން ދެ މެންބަރުންނެވެ. 

ޑިމޮކްރެޓިކް ޕާޓީގެ މެންބަރެއް ކަމުގައިވާ ރަޝީދާ ޓްލައިބަކީ އެމެރިކާގެ ކޮންގްރެސްގައި ޚިދުމަތްކުރި ފުރަތަމަ ފަލަސްތީން ދަރިކޮޅުގެ އަންހެން މެންބަރެވެ. އޭނާ ވަނީ އަންގާރަ އިއްޔެގެ އިންތިޚާބުގައި މިޝިގަންގެ މަންދޫބެއްގެ ގޮތުގައި ހަތަރުވަނަ ދައުރަކަށް އިންތިޚާބުވެފައެވެ. 

ކުރީގެ ރެފިއުޖީއެއް އަދި ސޯމާލިއާ ދަރިކޮޅުގެ އެމެރިކާ މީހެއް ކަމަށްވާ އިލްހާން އުމަރު ވަނީ މިނެސޯޓާގެ ފަސް ވަނަ ޑިސްޓްރިކްޓުން ތިންވަނަ ދައުރަކަށް އިންތިޚާބުވެފައެވެ. 

ސޯޝަލް މީޑިއާގައި ޕޯސްޓެއް ކުރައްވައި އުމަރު ވަނީ އޭނާގެ އިންތިޚާބީ ކެމްޕޭނުގައި ބުރަ މަސައްކަތް ކޮށްދެއްވި އެންމެހައި ފަރާތްތަކަށް ޝުކުރު އަދާކުރައްވާފައެވެ.

"އަޅުގަނޑުމެންގެ ބުރަ މަސައްކަތުން ވަނީ ނަތީޖާ ނެރެފައި. އަޅުގަނޑުމެން 117,716 ގެއަށް ޒިޔާރަތް ކުރިން. ގާތްގަނޑަކަށް 108,226 ފޯނު ކޯލު ކުރިން. އަދި 147,323 މެސެޖު ފޮނުވިން. މިއީ ރަނގަޅު މުސްތަޤުބަލެއް ލިބޭނެ ކަމަށް ޤަބޫލުކުރާ އެންމެންގެ ކާމިޔާބީ،"" އޭނާ ވިދާޅުވިއެވެ.