ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ އާ ގުޅުން އޮތް ކުންފުންޏަކުން ހިންގާ ފެކްޓަރީތައް ހުއްޓިފައިވިޔަސް، ދަޢުލަތުން މާލީ އެހީތެރިކަން ފޯރުކޮށްނުދޭނެ ކަމަށް ސަރުކާރުން ބުނެފިއެވެ.

ބަންގްލަދޭޝްގެ އެންމެ ބޮޑު އެއް ކުންފުނި، ބެކްސިމްކޯއިން ހިންގާ 12 އަށް ވުރެ ގިނަ އަންނައުނު ފެކްޓަރީތަކުގައި 40،000 އަށް ވުރެ ގިނަ މީހުން މަސައްކަތް ކުރެއެވެ.

ބަންގްލަދޭޝްގައި އެތައް ހާސް ދަރިވަރުން ނުކުމެ ކުރި މުޒާހަރާތަކަށްފަހު، ބޮޑުވަޒީރު ޝެއިޚް ހަސީނާގެ ވެރިކަން ވެއްޓުމުން، ބެކްސިމްކޯގެ އެއް ފައުންޑަރު ސަލްމާން އެފް ރަޙްމާން ވަނީ ޤައުމު ދޫކޮށް ދާން އުޅެނިކޮށް ހައްޔަރުކޮށްފައެވެ.

އޭނާ އަކީ ޝެއިޚް ހަސީނާގެ ވަރަށް އަރިސް އެޑްވައިޒެރެކެވެ.

ސަލްމާން ހައްޔަރުކުރި ފަހުން، އެ ކުންފުނިން ހިންގާ ފެކްޓަރީތައް ގާތްގަނޑަކަށް ހުއްޓުމަކަށް އައިސް، ބައި ލައްކަ އެއްހާ މީހުންގެ ވަޒީފާ ގެއްލިދާނެކަމުގެ ބިރު ވަނީ ބޮޑުވެފައެވެ.

ބަންގްލަދޭޝްގެ އިންތިޤާލީ ސަރުކާރުން ބުނީ، ފެކްޓަރީތަކުގެ މަސައްކަތް ފަށަން މަސައްކަތް ކުރި ކަމަށާއި، ނަމަވެސް، އެ ކުންފުނީގެ ވެރިންގެ ފަރާތުން އެއްބާރުލުން ލިބިފައިނުވާ ކަމަށެވެ.

ބައެއް މަސްދަރުތަކުން ބުނާ ގޮތުގައި، މިކަމުގެ އެންމެ ބޮޑު ހުރަހަކަށްވެފައިވާނީ، އެ ކުންފުނިން ނަގާފައިވާ ލޯނުތައް ނުދައްކާ ހުރުމެވެ.

ބަންގްލަދޭޝްގެ މަރުކަޒީ ބޭންކުން އަންދާޒާކުރާ ގޮތުގައި، އެ ކުންފުނިން ނުދައްކާ ހުރި ލޯނުތަކާއި ދަރަނިތަކުގެ އަގު 4.1 ބިލިއަން އެމެރިކާ ޑޮލަރަށް އަރައެވެ.

ހަސީނާގެ ސަރުކާރާ ދެކޮޅަށް އެތައް ހަފްތާއަކަށް ދިގުދެމިގެންދިޔަ މުޒާހަރާތަކުގެ ތެރެއިން ސަލާމަތީ ބާރުތަކާ ދެމެދު ހިނގި ކުރިމަތިލުންތަކުގައި 700 އެއްހާ މީހުން ވަނީ މަރުވެފައެވެ.

އެ ޖަރީމާތަކަށް ޖަވާބުދާރީވުމަށް، ހަސީނާ އަނބުރާ ފޮނުވައިދިނުމަށް ބަންގްލަދޭޝްގެ އިންތިޤާލީ ސަަރުކާރުން ވަނީ އިންޑިއާ ސަރުކާރުގައި ރަސްމީކޮށް އެދިފައެވެ.