އަފްޣާނިސްތާނުގެ ސަރުކާރު ވައްޓާލައި، ވެރިކަމާ ޙަވާލުވެތިބި ޠާލިބާނު ޖަމާޢަތުގެ އިސްވެރިންގެ ތެރޭގައި ހިމެނޭ ދެ މީހަކު ހައްޔަރު ކުރުމުގެ އަމުރު ހޯދުމަށް އެދި ބައިނަލްއަޤުވާމީ ޖިނާޢީ ކޯޓު (އައިސީސީ) އަށް ހުށަހަޅާފައިވާ މައްސަލައަކީ ސިޔާސީ ކަމެއްގެ ގޮތުގައި އެ ޖަމާޢަތުން ސިފަކޮށްފިއެވެ.

އައިސީސީގެ އިސް ޕްރޮސިކިޔުޓަރ ކަރީމް ޚާންގެ އޮފީހުން ބުނީ، ޠާލިބާނުންގެ ވެރިޔާ ހަޔިބަތުالله އަޚުންދިޛާދާގެ އިތުރުން ޢަބްދުލް ޙަކީމް ޙައްޤާނީ ހައްޔަރުކުރަން ބޭނުންވަނީ، އަފްޣާނިސްތާނުގެ އަންހެނުންނާއި އަންހެން ކުދިންގެ ޙައްޤުތަކަށް އަރައިގަތުމާއި، އެ މީހުންނާ ދެކޮޅަށް އަނިޔާވެރި ޖިނާޢީ ކުށްތައް ހިންގުމުގެ ކުށުގެ ދަޢުވާއާ ގުޅިގެން ކަމަށެވެ.

"އައިސީސީގެ އެހެން ގިނަ ނިންމުންތަކެކޭ އެއްފަދައިން މިއީ ވެސް ހަމަހަމަ ޤާނޫނީ އަސާސްތަކުން އެއްކިބާވެ، ތަފާތުކުރުމުގެ ތެރެއިން ސިޔާސީ ގޮތުން ކުރާ ކަމެއް،" އެކްސްގައި ޝާއިޢުކޮށްފައިވާ ފޮރިން މިނިސްޓްރީގެ ބަޔާނެއްގައި ބުންޏެވެ.

އެ މިނިސްޓްރީން ބުނީ، 20 އަހަރު ވައްދެން ބޭރުގެ އެކި ބާރުތަކުން އަފްޣާނިސްތާނު އިސްތިޢުމާރުކޮށްގެން ޖަރީމާތައް ހިންގިއިރު، އައިސީސީން ހަނުއޮތްއިރު، ދީނީ އަދި ސަޤާފީ ކަންކަމަށް ބެލުމެއް ނެތި، އިންސާނީ ހައްޤުތަކުގެ މިންގަނޑެއް އަމިއްލަ ކަނޑައެޅުމަކީ ބޭއިންސާފު ކަމެއް ކަމަށެވެ.

އަފްޣާނިސްތާނުގެ އިންތިޚާބީ ސަރުކާރު ވައްޓައިލާފައި ވަނީ 2021 ވަނަ އަހަރުގެ އޮގަސްޓު މަހުގެ 15ވަނަ ދުވަހުއެވެ. އެއަށް ފަހު، އެ ޤައުމުގެ އަންހެނުންނާއި އަންހެން ކުދިންނަށް މެދުކެނޑުމެއް ނެތި އަނިޔާވެރި ކުށްތަކާ ކުރިމަތިލާން ޖެހިފައިވާ ކަމުގައި ޚާންގެ އޮފީހުން ބުންޏެވެ. ވެރިކަން ފޭރިގަތުމަށް ފަހު ޠާލިބާނުން ވަނީ އަންހެނުންނާއި އަންހެން ކުދިން ގިނަ ޙައްޤުތަކަކުން މަހުރޫމު ކުރުވާފައެވެ. އޭގެ ތެރޭގައި ތަޢުލީމު ހާސިލު ކުރުމުގެ ޙައްޤާއި، އާމްދަނީ ހޯދުމަށް ވަޒީފާ އަދާކުރުމުގެ ޙައްޤުގެ އިތުރުން ފަރުދީ މިނިވަން ކަން ވެސް ވަނީ ފޭރިގެންފައެވެ.